DAISH terorıstik tobynyń sodyrlary uıym basshysy Abý Bakr ál-Baǵdadıdiń qaıtys bolǵandyǵy jaıly aqparatty rastady, dep habarlaıdy Qamshy aqparattyq agenttigi Sputnik saıtyna silteme jasap.

Bul jaıynda aqparat jergilikti Al Sumaria telearnasynda jarıalanǵan.

Birneshe kún buryn Reseı Qorǵanys mınıstrliginde ál-Baǵdadı 28 mamyr kúni Rakkı aımaǵyna Reseıdiń jasaǵan soqqysynyń saldarynan qaza tapty degen aqparat jarıalanǵan bolatyn. Shabýyldyń nátıjesinde, 330 sodyr óltirilgen. Maýsym aıynyń sońyna qaraı ırandyq telearnalarda DAISH terorıstik uıymynyń basshysy bolýy múmkin degen atpen sýretter jarıa bolǵan.

Abý Bakr ál-Baǵdadı (shyn esimi – Ibragım Avad Ibragım ál-Badrı) 2014 jyldyń shilde aıynda Taıaý Shyǵystaǵy «Islam halıfatyn» jarıa etken bolatyn. Ol 1971 jyly Irakta týylyp, tegerandyq Islam ýnıversıtetinde bilim alǵan jáne Baǵdad meshitteriniń birinde ımam bolǵan, keıinnen terrorısterdiń qataryna qosylyp, «Al-Kaıdanyń» Iraktaǵy bólimin basqarǵan. Keıinnen ol basqarǵan uıym DAISH atty uıymǵa aınalyp, Al-Kaıdadan bólinip shyqqan. 2014 jyly terrorıster Irak pen Sırıanyń soltústigin basyp alyp, Rakkı qalasyn ózderniń astanasy etip, al ál-Baǵdadıdi «Halıf Ibragım» dep atap ketken.