Marqum akter Shalqar Úrkimbaevtyń kelinshegi budan basqa amaly joǵyn aıtyp, jurttan kómek surady. Jalǵyz ulyna ota jasatýǵa qomaqty qarjy kerek bolǵan eken. Áıeldiń jan aıqaıyn estigen juldyzdar tómendegi jazbany jarysa bólisip, jelidegiler men áriptesterinen kómek surap jatyr, dep habarlaıdy Qamshy.kz aqparat agenttigi Stan.kz saıtyna silteme jasap.

“Aqsana Úrkimbaeva degen kelinshek bar. Talantty akter, osydan birneshe jyl buryn qaıǵyly jaǵdaıda qaıtys bolǵan Shalqar Úrkimbaevtyń jubaıy. Úsh balamen qaldy. Osyǵan deıin Qudaı qosqan qosaǵynan aıyrylyp qaıǵy jutty. Odan óz densaýlyǵy syr berip, anaý-mynaý shydas bermeıtin synaqty ótkizdi basynan. Odan balalarymen dalada qala jazdap, baspanasynyń (bir bólmeli jataqhana) máselesimen (úkimetten kómek retinde alyp qalý úshin) bar ómiri ótti Aqsananyń.

Endi baýyr eti balasy mynadaı aýrýǵa tap bolyp, elden ashyq túrde kómek surap otyr. Ózge amaly da qalmaǵan. Ýaqyt az, kún sanaýly! Marqum Shalqar men Aqsananyń kózi jáýdiregen balapanyna kóp bolyp kómek sozaıyq, repost jasaıyq, post jazaıyq! Aqsana maǵan eshkim de emes, ómirimde bir ret kórmegenmin. Ózi telefon shalyp ótingen soń, baspanasy týraly osynda jazǵanmyn baıaǵyda. Qazir jazǵanyn oqyp, júregim tolqyp ketti… Bir kómek kerek bolsa, osy Aqsanaǵa kerek! Kezinde Shalqarmen aralasqan qyz-jigitter osyndaıda otbasynyń janynan tabylsa eken deısiń! Árýaǵy rıza bolar, eń bolmasa… ”