12 shildede Qazaqstannyń Syrtqy ister mınıstrliginde «Qazaqstannan Koreıa Respýblıkasyna zańsyz eńbek mıgrasıasy máselesi» atty taqyrypta buqaralyq aqparat quraldarynyń ókilderine Konsýldyq qyzmet departamentiniń dırektory Ardaq Mádıev pen Koreıa Respýblıkasynyń Qazaqstandaǵy Elshisi Kım De-sıktiń birlesken baspasóz konferensıasy ótkizildi, dep habarlaıdy Qamshy aqparat agenttigi.

Baspasóz konferensıasynda A. Mádıev 2014 jylǵy 29 qarashada kúshine engen 30 kúnge deıin vızalyq talaptardy ózara joıý týraly Qazaqstan Respýblıkasynyń Úkimeti men Koreıa Respýblıkasynyń Úkimeti arasyndaǵy kelisimniń negizgi erejelerin baıandap berdi. Kelisimge sáıkes, jaramdy jol júrý qujattary bar Qazaqstannyń azamattary vızany aldyn ala almaı turyp, Koreıa Respýblıkasyna tek týrızm, saýyǵý nemese emdelý, jeke istermen nemese iskerlik maqsatpen ǵana kele alady jáne 30 táýlikten aspaıtyn merzimde vızasyz bola alatynyn erekshe atap ótti. Koreıa Respýblıkasynda eńbek nemese mısıonerlik qyzmetpen aınalysýǵa, oqý mekemelerinde oqýǵa nemese turýǵa nıet bildirgen azamattar tıisti vızalardy alýy tıis.

Sonymen qatar, atalǵan kelisim kúshine engennen keıin zańsyz mıgrasıa jaǵdaılary jıilendi – keıbir derekterge sáıkes, 2017 jylǵy maýsymnyń sońyndaǵy jaǵdaı boıynsha 5 700-ge jýyq Qazaqstan azamattary Ońtústik Koreıa aýmaǵynda zańsyz turýda (2016 jyly – 3 198). Qazaqstan tarapynan zańsyz mıgrasıanyń ulǵaıýyn boldyrmaý maqsatynda QR SİM múddeli memlekettik organdarmen óz quzyretteri sheńberinde tıisti sharalardy qabyldaý máselesin pysyqtaýda.

Óz kezeginde, Kım De-sık Qazaqstan men Koreıanyń 2009 jyldan beri strategıalyq áriptester ekenin atap ótip, Qazaqstan azamattaryn Koreıaǵa kirgizbeı keri qaıtarý faktilerin azaıtý úshin tıisti sharalar qoldanýda, sonyń ishinde keń aýqymdy túsindirý jumystary júrgizilýde, dep málimdedi. Sondaı-aq, ol qazaqstandyqtardyń elge kirgizilmeýiniń negizgi sebepterin naqtylady. Atap aıtqanda, koreı klınıkasyna emdelýge bara jatqanynyń rastalmaýy; týrısik maqsatta bolsa týystary, tanystary nemese týrısik agenttikterdiń kórsetilmeýi, Qazaqstan azamattaryn Koreıada bolǵan kezde alyp júretinder týraly derekterdiń bolmaýy, iskerlik úshin bara jatqandar úshin Koreıadaǵy shaqyrýshy uıymdar, áriptester, jumys jobalary týraly derekterdiń nemese naqty dálelderdiń bolmaýy jáne t.b.

Sonymen birge, Ońtústik Koreıa Elshisi deportasıalaný qaterin barynsha azaıtý úshin Qazaqstan azamattaryna usynystar berdi. Onyń aıtýynsha, eger sapardyń maqsaty emdelý bolsa, elge kirý kezinde aýrýhana koordınatory kómegimen koreı aýrýhanasynda kepildeme arqyly emdelý týraly rastaý qujattarynyń bolýy qajet. Týrızm nemese iskerlik sapar jaǵdaıynda, ekijaqty bılet, qonaq úıdiń brony, bolatyn (kóretin) jerleri men ǵımarattardyń tizbesi, tólem qabilettiligin rastaıtyn bank shoty jónindegi anyqtama nemese kredıttik karta boıynsha úzindi kóshirme qoldarynda bolýy tıis. Koreıaǵa birinshi ret baratyn nemese buryn bir nemese birneshe ret Koreıa aýmaǵyna kirgizilmegen azamattarǵa Koreıa Respýblıkasynyń Astanadaǵy Elshiligine nemese Almatydaǵy Bas konsýldyǵyna júginip, elge kedergisiz kirý úshin tıisti vızany alýǵa bolatynyn atap ótti.

Baspasóz konferensıasynyń sońynda A. Mádıev pen Kım De-sık jýrnalısterdiń suraqtaryna jaýap berdi.

Sholýshy: Gúlim Jaqan