«Genderlik zorlyq-zombylyqqa qarsy belsendi is-qımyldyń 16 kúni» halyqaralyq aksıasy aıasynda Álıhan Bókeıhanov ýnıversıtetinde «Turmystyq zorlyq-zombylyqqa qarsy turý: máseleler men sheshimder» taqyrybynda oblystyq konferensıa ótti. İs-sharany «Januıa ortalyǵy» qoǵamdyq qory Abaı oblysynyń ishki saıasat basqarmasynyń qoldaýymen uıymdastyrdy.

Jıynǵa Abaı oblysynyń ishki saıasat basqarmasy basshysynyń orynbasary Arman Jemagýlov, oblystyq Polısıa departamenti jergilikti polısıa qyzmeti basqarmasy bastyǵynyń orynbasary polısıa podpolkovnıgi Baýyrjan Sadaqbaev, sondaı-aq Álıhan Bókeıhanov jáne Shákárim ýnıversıtetteriniń profesor-oqytýshylar quramy, oblystyq máslıhat depýtattary, áıelderdi zorlyq-zombylyqtan qorǵaý jónindegi ınspektorlar jáne BAQ ókilderi qatysty.

Konferensıanyń negizgi maqsaty – turmystyq zorlyq-zombylyq máselelerine nazar aýdarý ǵana emes, áıelder men balalarǵa arnalǵan qaýipsiz jáne qoldaýly orta qurý joldaryn talqylaý.

İs-shara barysynda arnaıy shaqyrylǵan sarapshylar «Turmystyq zorlyq-zombylyqtyń máselelerin sheshýdegi memlekettiń róli», «Eńbek jáne otbasylyq-neke zańnamasy arqyly turmystyq zorlyq-zombylyq qurbandarynyń quqyqtaryn qorǵaý», «Otbasylyq kelispeýshilikterdi sheshýde psıhologıalyq qoldaý ortalyqtarynyń róli» taqyryptarynda baıandamalar jasady.

Pedagogıka ǵylymdarynyń kandıdaty Nazıgúl Gazızova konferensıanyń mańyzdylyǵyna erekshe nazar aýdardy.

«Turmystyq zorlyq-zombylyq tek bizdiń óńirde emes, búkil álemde ózekti másele bolyp otyr. Bul problemany sheshý úshin jıyndar men talqylaýlardyń jıi ótýi mańyzdy. Qoǵamdaǵy áıelder men balalardyń qaýipsizdigin qamtamasyz etýge baǵyttalǵan usynystardyń nátıjesinde oń ózgeristerge qol jetkize alamyz dep senemin» – dedi ol.

Polısıa departamentiniń ókili Baýyrjan Sadaqbaev turmystyq zorlyq-zombylyq máseleleriniń jyl saıyn artyp kele jatqanyn atap ótti.

«Zorlyq-zombylyq jaǵdaılarynyń aldyn alý úshin tek quqyq qorǵaý organdary ǵana emes, búkil qoǵam bolyp kúsh biriktirýimiz qajet. Ókinishke oraı, keı jaǵdaılarda zardap shekkender úıine orala almaı, daǵdarys ortalyqtaryna májbúrli túrde júginedi. Bul máseleni sheshý úshin zańnamany jetildirý men túsindirý jumystaryn keńeıtý qajet» – dedi spıker.

Qatysýshylarǵa «Ashyq mıkrofon» formaty usynylyp, óz pikirlerin bildirýge múmkindik berildi. Turmystyq zorlyq-zombylyqqa qatysty máselelerdi sheshý boıynsha naqty usynystar aıtylyp, bolashaq josparlarǵa engizýge bolatyn tyń ıdeıalar talqylandy.

Konferensıa sońynda oblystyq ishki saıasat basqarmasy tarapynan is-sharaǵa belsendi qatysqan spıkerlerge alǵys hattar tabystaldy. İs-shara barlyq qatysýshylardyń úlken qoldaýyna ıe bolyp, zorlyq-zombylyqqa qarsy kúrestiń jańa qadamdaryna jol ashty. Qoǵamda áıelder men balalardyń qaýipsizdigin qamtamasyz etý úshin zorlyq-zombylyqqa «nóldik tózimdilik» qaǵıdatyn qalyptastyrý – memlekettiń basty mindetteriniń biri.