Almaty TV kásipkerlikti damytýǵa arnalǵan «Made in Almaty» atty jańa jobany iske qosady. Ár shyǵarylym zaýyttan shaǵyn sehqa deıingi aralyqtaǵy kásiporyndardyń kreatıvti jáne qarqyndy damý jolyn nazarǵa almaq. 

«Made in Almaty» jobasynyń maqsaty – qalada óndirilgen otandyq ónimderdi kórsetip, onyń sapasy men básekege qabilettiligi jáne otandyq ónerkásip salasyn damytýǵa atsalysyp júrgen adamdardyń kúndelikti jumysy jaıly aıtý. Búginde Almatyda jumyspen qamtylǵandardyń 85 paıyzdan astamy SHOB salasynda jumys isteıdi. Tek sońǵy jylda ony damytý úshin búdjetten 53,1 mlrd teńge bólindi. 

Osyndaı tabysty damyp kele jatqan kásiporyndardyń biri – ǵımarat, áleýmettik ınfraqurylym jáne ónerkásip qurylysynda qoldanylatyn kabel jáne sym ónimderin shyǵaratyn zaýyt. Tek bir aıdyń ishinde keshen 120 tonnadan astam daıyn ónim shyǵarady. Qyrǵyzstan men Ázirbaıjanǵa eksport jolǵa qoıyldy. Aldaǵy ýaqytta Eýropa elderine eksporttaý josparlanǵan.

«Bul salada jumys istegenime 20 jyldan assa da maǵan jumys barysyndaǵy ár sát qyzyqty. Qazir jas mamandardy oqytyp jatyrmyz. Bolashaqta zaýytty úlkeıtip, múmkindikterdi úlǵaıtyp, jumys ornyn kóbeıtýdi josparlap otyrmyz», – dedi zaýyttyń bas ınjeneri Azatbek Qýanyshbekuly.

Búginde Almaty Indýstrıaldy aımaǵynda 11,6 myń jumys orny ashylyp, 485 mlrd teńgeniń 67 jobasy júzege asyrylýda. Bıyl 3 myńǵa jýyq jumys ornyn qurýdy qajet etetin, quny 197 mlrd teńge turatyn 15 jobany iske qosý josparlanýda. Kabel-sym buıymdaryn shyǵaratyn zaýyt arqyly jergilikti kásiporyndardyń memleket qoldaýymen qalaı ósip, damyp, qala ekonomıkasyna ǵana emes, búkil elge paıda ákeletinin kórýge bolady.

Aıta keteıik, buǵan deıin «Almaty TV» telearnasy «Jumysshy mamandyqtary» jylynda Almaty qalasynyń komýnaldyq qyzmetkerlerine, qurylysshy, feldsher jáne t.b. keıipkerlerge arnalǵan «Shahar shyraıy» atty arnaıy jobany iske qosqan edi. Jýyrda «Almaty aýdandary», «Almaty kósheleri» jáne «Keri baılanys» sıaqty birqatar jańa baǵdarlamalar jaryq kóredi. Sondaı-aq jańalyqtar «Ekonomıka jańalyǵy» jáne «Qala tynysy» aıdarlarymen tolyqty.