Sý resýrstary jáne ırrıgasıa mınıstrligi aldaǵy 4 jylda Q.Sátbaev atyndaǵy kanaldyń 19 sýsorǵy agregaty men elektr jabdyqtaryn aýystyrýdy josparlap otyr.

Memleket basshysynyń tapsyrmasy boıynsha mınıstrlik álemde teńdesi joq gıdrotehnıkalyq qurylysty keshendi rekonstrýksıalaýdyń Jol kartasyn ázirledi. 
Q.Sátbaev atyndaǵy kanal Qaraǵandy, Pavlodar oblystary men Astana qalasyn aýyz sýmen qamtamasyz etip otyr. Atalǵan úsh óńirdegi óndiris oshaqtary men sharýa qojalyqtary da kanaldyń sýyn paıdalanady. Gıdrotehnıkalyq nysannyń jalpy uzyndyǵy - 458 shaqyrym. 

- Halyq sanynyń artýy jáne óndiristik kásiporyndardyń kóbeıýine baılanysty kanaldyń sý resýrstaryna suranys ulǵaıýda. Memleket basshysynyń tapsyrmasyn iske asyrý aıasynda bıyl mınıstrlik Q.Sátbaev atyndaǵy kanaldy keshendi jańǵyrtý jumysyn bastaıdy. Jol kartasyna saı, 2028 jylǵa deıin 19 sýsorǵy agregaty men elektr jabdyqtaryn jańartamyz. Osynyń nátıjesine sýmen qamtý sapasyn arttyryp, kanaldy uzaq merzim boıy jáne qaýipsiz paıdalanýdy qamtamasyz etkimiz keledi,- dedi Sý resýrstary jáne ırrıgasıa vıse-mınıstri Erbolat Ibraıhanov.