Qazaqstannyń Ekologıa mınıstrligi merekelik kúnder tizimine ózgerister engizý týraly buıryq jobasyn daıyndady.
Qujatqa sáıkes, merekelik kúnder tizimine 3 qyrkúıek - Qazaqy ıt tuqymdary kúnin qosý josparlanǵan.
Jobanyń negizdemesine sáıkes, ókinishke qaraı, Qazaqstanda kóptegen merekeler bolǵanymen, qazaqtyń tazy jáne tóbet tuqymdaryn saqtaý jáne kóbeıtý salasyndaǵy mamandarǵa arnalǵan arnaıy mereke joq.
Tazy men tóbet – qazaqtyń ejelgi ıt tuqymdary, halqymyzdyń maqtanyshy, "Jeti qazynanyń" biri. Tazy – ańshylyqta taptyrmas kómekshi bolsa, tóbet – ata-babalarymyzdyń mal-múlkin senimdi qorǵaýshy. Bul tuqymdar halqymyzdyń tarıhymen tyǵyz baılanysty, olardyń shyǵý tegi ǵasyrlar tereńinen bastaý alady.
Túsindirme jazbaǵa sáıkes, Qazaqy ıt tuqymdary kúni leksıalar, semınarlar, kórmeler jáne osy tuqymdardyń tarıhyna, erekshelikterine, kútimine arnalǵan is-sharalarmen atap ótilýi múmkin, bul jalpy aqparattandyrý deńgeıin arttyrady.
Sonymen qatar, bul merekeniń bekitilýi ıt ósirýshilerge, kınologıalyq uıymdarǵa jáne qazaqy ıt tuqymdaryn súıetinderge tájirıbe almasýǵa, kórmelerge, jarystarǵa jáne basqa da sharalarǵa qatysýǵa kóbirek múmkindik beredi.
Pikir qaldyrý