«Árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis. Sol úshin «Jaıly mektep» ulttyq jobasy qolǵa alyndy», - Qasym-Jomart Toqaev, Qazaqstan Respýblıkasynyń Prezıdenti.

2022 jyly Memleket basshysy Qazaqstan halqyna Joldaýynda «Jaıly mektep» ulttyq jobasyn júzege asyrýdy tapsyrdy. Joba aıasynda 2025 jyldyń sońyna deıin 460 myń oryndyq 217 zamanaýı mekteptiń qurylysy josparlanǵan, onyń ishinde 105 mektep 2024 jyly salyndy.

«Jaıly mektep» ulttyq jobasy balalardyń turǵylyqty jerine qaramastan, zamanaýı talaptarǵa saı keletin tegin bilim alý múmkindigin qamtamasyz etýge baǵyttalǵan.

Bastama jaıly mektepterdiń materıaldyq-tehnıkalyq bazasyn jaqsartyp qana qoımaı, balalardyń shyǵarmashylyq jáne ıntellektýaldy qabiletterin damytýǵa yqpal etetin orta qalyptastyrady.

Jaıly mektepterdiń kólemi tıptik mektepterge qaraǵanda, 15-20%-ǵa keń, sondaı-aq tehnıkalyq jaraqtanýy da 4 ese artyq. Mektepterde robototehnıka kabınetteri, STEM-zerthanalar, horeografıa zaldary, kovorkıng aımaqtary, 4 sport zaly qarastyrylǵan, sondaı-aq alǵashqy áskerı daıyndyq úshin arnaıy ashyq alańdar jabdyqtalady. Bastaýysh jáne joǵary synyp oqýshylary bólek bloktarda bilim alady. Jaıly mektepterdegi eń basty jaılylyq -  ergonomıkalyq keńistiktiń qurylýy.

Jaıly mektepterde ınklúzıalyq bilim berýge erekshe kóńil bólinýde. Erekshe bilim berý qajettilikteri bar balalar úshin jeke sanıtarlyq bólmelerimen keń kabınetter qarastyrylǵan. Sonymen qatar mektepterde jedelsaty, pandýstar, arnaıy belgiler, psıholog, logoped jáne defektolog kabınetteri bar.

Jaıly mekteptiń ereksheligi sonda, ár blokta oqýshylar men pedagogter úshin demalys aımaqtaryn kórýge bolady. Munda jumsaq jıhazdar, kitaptar, mýzykalyq aspaptarmen ústel oıyndary qoıylǵan.  

Mektepter sonymen qatar zamanaýı beınebaqylaý jáne mektepke kirip-shyqqandardy qadaǵalaý júıelerimen qamtamasyz etiledi.

Jobanyń negizgi mindetteriniń biri - oqý prosesinde jańa tehnologıalar men ádistemelerdi meńgergen bilikti pedagogıkalyq kadrlarmen qamtamasyz etý.

Budan bólek, elimizde 510 myń oqýshy ornyna  arnalǵan 422 mektep salynyp, rekordtyq kórsetkishke qol jetkizildi.  Bul 32 apatty jáne 71 úshaýysymdy mektep máselesin sheship, el aýmaǵyndaǵy 200 mektepte oqýshy orny tapshylyǵyn joıýǵa múmkindik berdi.

Bilim berý ınfraqurylymyn qoldaý qorynyń jelisi boıynsha 100 myńǵa jýyq oqýshy ornyna arnalǵan 89 mekteptiń qurylysy qarjylandyryldy.

2024 jyly 80 myńnan astam pedagog biliktilikti arttyrýdyń tegin kýrstarynan ótti.

Oqýshy oryndarynyń tapshylyǵy, úshaýysymdy oqytý jáne apattyq mektepter máselesin sheshý, sondaı-aq qalalar men aýyldar arasyndaǵy bilim berý ınfraqurylymy sapasynyń aıyrmashylyǵyn azaıtý maqsatynda elimizde mektep qurylysyn júrgizý jáne renovasıalaý boıynsha bastamalar qarqyndy iske asyrylýda.

2025 jyly 300 myń oryndyq 200-ge jýyq mekteptiń qurylysy júzege asyrylady.

«Aýyl mektepterin zıatkerlik, sondaı-aq qoǵamdyq ortalyq retinde damytý mańyzdy. «Mektebi bar aýylda tirshilik bar» dep beker aıtylmaǵan», -  Qasym-Jomart Toqaev, QR Prezıdenti.

Memleket basshysynyń tapsyrmasy boıynsha jyl saıyn aýdandyq jáne aýyldyq 1000 mektep jańǵyrtylýda.

Búgingi tańda orta bilim berý uıymdarynyń 67%-yn (5236 mektep) aýdandyq jáne aýyldyq mektepter quraıdy, onyń ishinde 4 myń mektep jańǵyrtyldy.

Taıaýdaǵy úsh jyl ishinde elimizdiń barlyq óńirinde 1231 mektepti renovasıalaý josparlanýda, onyń ishinde 820 mektep aýyldyq jerlerde ornalasqan. Renovasıa mektepterdiń materıaldyq-tehnıkalyq bazasyn jaqsartýǵa, ınovasıalyq bilim berý tehnologıalaryn engizýge jáne pedagogterdiń biliktiligin arttyrýǵa múmkindik beredi.

Bul sharalar halyqtyń týǵan jerinen taban aýdaryp, qalaǵa jappaı kóshý máselesin de sheshedi.

Elimizdiń barlyq óńirinde jańa bilim berý nysandaryn salý arqyly qosymsha jumys oryndary qurylýda, bul áleýmettik, ekonomıkalyq jaǵdaıdy jaqsartýǵa jáne jalpy qurylys salasyn damytýǵa yqpal etedi. 2024 jyldan bastap jańa salynǵan mektepterde 5000-ǵa jýyq pedagog jumyspen qamtyldy.

Ulttyq jobanyń taǵy bir mańyzdy baǵyttarynyń biri - qazaqstandyq taýarlar men qyzmetterdi óndirýshilerdi qoldaý bolyp tabylady.

Jańa mektepterge barlyq jıhazdardy otandyq kásiporyndar jetkizedi. Bul ulttyq ekonomıkany nyǵaıtýǵa jáne qazaqstandyq óndirýshilerdiń jańa jumys oryndaryn qurýyna, eldegi ekonomıkalyq turaqtylyqqa, jergilikti ónerkásipti damytýǵa yqpal etedi.

Zamanaýı formattaǵy mektepter barlyq qazaqstandyq balalardyń qoljetimdi ári jaıly, qaýipsiz ortada sapaly bilim alýyna jol ashady.