QR Ulttyq kitaphanasynda «Jasandy ıntellekt jáne ádebıet» atty ǵylymı konferensıa ótti. Atalǵan jıyn qazirgi zamandaǵy ózekti máselelerdiń biri – jasandy ıntellekttiń ádebıet pen mádenıet salalaryna yqpalyn ǵylymı turǵyda zerdeleýge arnaldy. Búginde jańa tehnologıalar damyp, jasandy ıntellekt shyǵarmashylyq úderisterge belsendi aralasa bastady. Osy oraıda onyń kórkem ádebıetke tıgizer áseri, múmkindikteri men týyndaýy múmkin táýekelder tereń taldaýdy qajet etedi.
Osy máselelerge oraı Memleket tarıhy ınstıtýtynyń Ǵylymı-aqparat bóliminiń basshysy Amanǵosov Erkebulan Rýslanbekuly óz baıandamasynda jasandy ıntellektini paıdalanýǵa baılanysty mańyzdy tarıhı aspektilerge toqtaldy. Ol JI-diń tarıhı derekterdi óńdeý barysynda oryn alýy yqtımal burmalaýshylyqtar men aqparattyq qatelikterdiń qaýiptiligine nazar aýdaryp, ásirese folk-hıstorı men jalǵan narratıvterdiń taralý qaýpin atap ótti. Generatıvti JI-diń «eski foto» nemese «arhıv qujaty» sıaqty jasandy materıaldar týdyrýy qoǵamnyń tarıhı sanasyna keri áser etýi múmkin ekendigin aıtty. Dál osy sebepti birqatar elderde arhıvter men mýzeıler janynan JI nátıjelerin kásibı tarıhshylar saraptaıtyn arnaıy keńester jumys isteıtini, al IýNESKO men Eýropalyq komısıa tarıhı derekterdi tekserý men etıkalyq shekteýler engizý tetikterin usynyp otyrǵany baıandaldy. Ǵalym qorytyndylaı kele, jasandy ıntellektpen jumys «tarıhshy – JI – qoǵam» úshtaǵany negizinde qurylýy tıis ekenin, tarıhı paıym jasaý mindeti adam mamandarǵa ǵana tıesili bolý kerektigin atap ótti.
Konferensıanyń basty maqsaty – jasandy ıntellekt pen ádebı shyǵarmashylyqtyń ózara baılanysyn saralap, avtorlyq quqyq pen tildik-estetıkalyq normalarǵa qatysty jańa suraqtarǵa jaýap izdeý boldy. Sonymen qatar JI-diń ádebı tilge, kórkem oılaýǵa jáne ulttyq ádebıet damýyna yqpaly da nazarǵa alyndy.
İs-shara barysynda ádebıettanýshylar, qalamgerler, zertteýshiler men sala mamandary baıandama jasap, ashyq pikir alańy uıymdastyryldy. Olar jasandy ıntellekt ákeletin tyń múmkindikter men syn-qaterlerdi, sondaı-aq shyǵarmashylyq erkindik pen etıkalyq jaýapkershilik máselelerin talqylady.
Konferensıaǵa Qazaqstan Jazýshylar odaǵynyń músheleri, M. Áýezov atyndaǵy Ádebıet jáne óner ınstıtýtynyń ǵalymdary, Ulttyq memlekettik kitap palatasy men ál-Farabı atyndaǵy Qazaq ulttyq ýnıversıtetiniń fılologıa fakúltetiniń oqytýshylary jáne jas zertteýshileri qatysty.
