Memlekettik zeınetaqy tóleý ortalyǵynyń 2025 jyly qazan aıyndaǵy dereginshe, Almatyda 259 614 zeınetker turady. Sonymen birge qalada 42 056 kópbalaly otbasy bar, olardyń ishinde «Altyn alqa» jáne «Kúmis alqa» alqamen marapattalǵan 6 488 ana bar. Bul týraly Almaty qalasy Jumyspen qamtý jáne áleýmettik baǵdarlamalar basqarmasy habarlady.
Basqarma mamandary bıylǵy toǵyz aı ishinde atqarylǵan jumystar týraly málimet usyndy. Osy kezeńde qaladaǵy 14 «Belsendi uzaq ómir súrý» ortalyǵyna 8 235 adam júgingen, olarǵa jalpy 455,3 myń qyzmet kórsetildi. Sonymen qatar memlekettik «Belsendi uzaq ómir súrý» ortalyǵy jumys isteıdi. Onyń Bostandyq aýdanynda eki jáne Medeý aýdanynda bir bólimshesi bar. Atalǵan ortalyqtarǵa kún saıyn 569 zeınetker barady, al bıyl 24 153 azamatqa 333,1 myń qyzmet kórsetilgen.
Otbasy ınstıtýtyn qoldaý baǵytynda «Baqytty otbasy» otbasyn qoldaý ortalyǵynyń da jumysy jalǵasyp taýyp otyr. Qazirgi ýaqytta bul ortalyqta 11 336 adam tirkelgen. 41,9 myń adam aqparattyq-resýrstyq qoldaý alǵan, 6,1 myń adamǵa quqyqtyq jáne ádistemelik keńes berilgen, 2,7 myń adam oqytý baǵdarlamalary men trenıńterge qatysqan, 237 adam jumyspen qamtylǵan, al 45 adamǵa 400 AEK-ke deıingi granttar berilgen.
2025 jyly qańtardan bastap Almatyda ómirlik qıyn jaǵdaıda qalǵan otbasylarǵa keshendi kómek kórsetetin Otbasyn qoldaý ortalyǵy jumys isteıdi. Jyl ishinde ortalyqqa 956 adam tirkelip, 2,8 myń azamat qoldaý alǵan. 439 adamǵa psıhologıalyq kómek, 242 adamǵa quqyqtyq keńes kórsetildi, 118 ret mobıldi toptardyń shyǵýy uıymdastyryldy, 989 jeke jumys jospary ázirlendi.
Balalarǵa baǵyttalǵan «Shyńǵa órleý» áleýmettik klýby jobasy boıynsha qalada 16 bólimshe jumys isteıdi. Az qamtylǵan otbasydan shyqqan 2 947 bala osy baǵdarlama aıasynda bilim alyp júr. 298 pedagog dáris beredi, onyń 228-i – halyqtyń áleýmettik osal toby (HÁOT) sanatyna jatatyn mamandar.
«Táýelsiz ómir mektebi» jobasymen 432 adam qamtylǵan. Otbasylar men balalardy qoldaýǵa baǵyttalǵan «Jarqyn ómir», «Jańa ómir» jáne Isker isi áleýmettik bastamalary júzege asyrylýda.
Almatyda «Ippoterapıa – beıimdelgen at sporty» jobasy da júzege asyrylyp jatyr. Jobaǵa 50 erekshe qajettiligi bar bala qatysyp otyr. Sonymen birge Qalalyq áleýmettik ıntegrasıa ortalyǵynda art-terapıa, teatr-terapıa jáne mýzyka-terapıa baǵdarlamalaryna júzdegen turǵyn qatysady.
