Almatyda sıfrlyq medısına bolashaqtyń emes, búgingi kúnniń kórinisi. Almaty Digital Medical Center (ADMC) negizinde qurylǵan ortalyq arqyly qala turǵyndary úıden shyqpaı-aq dárigerden keńes alyp, anyqtamalyq aqparatqa qol jetkizip, densaýlyǵyn onlaın baqylaýdan ótkize alady.

Almaty Digital Medical Center Almaty qalasy Qoǵamdyq densaýlyq saqtaý basqarmasy men Sıfrlandyrý basqarmasynyń qoldaýymen quryldy. Jobanyń maqsaty — árbir turǵynǵa medısınalyq kómekti barynsha jyldam, yńǵaıly jáne qoljetimdi etetin biryńǵaı sıfrlyq densaýlyq saqtaý ekojúıesin qalyptastyrý.

ADMC jumysynyń negizgi baǵyttarynyń biri — táýlik boıy jumys isteıtin 1312 qysqa nómir arqyly Biryńǵaı baılanys ortalyǵy. Munda operatorlar men dárigerler shuǵyl emes medısınalyq másele boıynsha keńes beredi, dárigerge jazylýǵa, dárihanany nemese zerthanany tabýǵa járdemdesedi, qajet bolsa salalyq mamandarǵa baǵyttaıdy. Kún saıyn ADMC qyzmetkerleri jedel járdemnen keıin úıine jiberilgen pasıentterge 1 500-den astam qońyraý shalady.

«Bizdiń jumysymyzdyń basty nátıjesi — myńdaǵan almatylyq der kezinde keńes alyp, asqyný qaýpinen saqtanady», — deıdi baılanys ortalyǵynyń jetekshisi Shyryn Tólekova.

Densaýlyqty qashyqtan baqylaý júıesi sozylmaly aýrýy bar pasıentterdi, júkti áıelderdi, bir jasqa deıingi balalardy jáne aýrýhanadan shyqqannan keıingi baqylaýdaǵy azamattardy qamtıdy. Búginde 110 myńnan astam turǵynnyń jaǵdaıyn táýlik boıy 30-dan astam dáriger baqylap otyr.

2025 jyly maýsym aıynan beri 15 myń pasıent kezekten tys qabyldaýǵa jiberilse, myńǵa jýyq adam aýrýhanaǵa jatqyzylǵan. Joba júkti áıelderdi júktilik boıy jáne bosanǵannan keıingi 42 kún ishinde baqylap, aı saıyn 3 200-den astam áıeldi qamtıdy.

«Tek tórt aıda shuǵyl medısınalyq kómek qajet bolǵan, biraq emhanaǵa júginbegen 362 júkti anyqtadyq. Biz qaýipterdi der kezinde anyqtaı aldyq», — dedi Shyryn Tólekova.

Sıfrlyq baqylaýdyń arqasynda sozylmaly aýrýy bar naýqastardy qadaǵalaý 27%-dan 48%-ǵa, al bosanýdan keıingi patronaj 28%-dan 81%-ǵa artty.

1312 nómiri arqyly Biryńǵaı baılanys ortalyǵyna degen suranys ta artyp keledi: maýsym aıynda 8 myń qońyraý qabyldansa, qazan aıynda bul kórsetkish 50 myńnan asqan. Turǵyndar keńes alyp, qabyldaýǵa jazylyp, emhanaǵa tirkelip, shaǵym men alǵys bildiredi.

Búgingi tańda ADMC platformasyna segiz qalalyq emhana qosylǵan. Bul júıe alǵash ret tirkeý bóliminiń júktemesin jáne pasıenttermen baılanys sapasyn naqty ýaqyt rejıminde baqylaýǵa múmkindik berdi. Aldaǵy ýaqytta qaladaǵy barlyq medısınalyq uıymdy osy júıege qosý josparlanyp otyr.

«Buryn biz pasıentterdiń emhanalarǵa qońyraý shalǵan-nemes shala almaǵanyn naqty bilmeıtin edik. Endi jaǵdaıdy aıqyn kórip otyrmyz: qońyraýlardyń 37 paıyzy jaýapsyz qalǵan. Búginde osy máseleni júıeli túrde sheship, kútý ýaqytyn eki esege qysqarttyq», — deıdi ortalyq ókilderi.

Sonyń nátıjesinde emhanalarǵa qajetsiz júkteme úsh esege azaıyp, pasıentterge kórsetiletin qyzmet sapasy jaqsardy. Ortalyqta gınekologtar, pedıatrlar, terapevtter, hırýrgtar, psıhıatrlar, ýrologtar syndy túrli sala mamandary jumys isteıdi.

Almatydaǵy sıfrlyq densaýlyq saqtaýdyń damýy zamanaýı tehnologıanyń shynaıy úlgisine aınalyp, qala turǵyndarynyń densaýlyǵyn jaqsartyp, medısınalyq kómekti ár adamǵa burynǵydan da jaqyn ete tústi.