2025 jylǵy 28 qarashada Astana qalasyndaǵy Ulttyq akademıalyq kitaphanada Halyqaralyq «16 kún zorlyq-zombylyqsyz» aksıasyna arnalǵan dóńgelek ústel uıymdastyryldy. Dóńgelek ústelQazaqstan Respýblıkasy Prezıdentiniń janyndaǵy Áıelder isteri jáne otbasylyq-demografıalyq saıasat jónindegi Ulttyq komısıanyń uıymdastyrýymen, BUU-Áıelder qurylymynyń tehnıkalyq qoldaýymen ótkizildi.
İs-shara memlekettik organdar, halyqaralyq uıymdar, sarapshylar qaýymdastyǵy jáne azamattyq qoǵam ınstıtýttarynyń ókilderin biriktirdi. Qatysýshylar áıelder men balalardyń qaýipsizdigin nyǵaıtý boıynsha júıeli sharalardy, sondaı-aq osy saladaǵy memlekettik saıasatty odan ári jetildirý joldaryn talqylady.
«16 kún zorlyq-zombylyqsyz» aksıasy jyl saıyn 25 qarashadan 10 jeltoqsanǵa deıin álemniń 90-nan astam elinde ótkiziledi jáne qoǵamnyń zorlyq-zombylyq máselesine habardarlyǵyn arttyrýǵa, zorlyqqa nóldik tózimdilik mádenıetin qalyptastyrýǵa baǵyttalǵan. Qazaqstan dástúrli túrde bul bastamany qoldaıdy, al Ulttyq komısıa elimiz boıynsha is-sharalardy úılestirip, memlekettik organdar, úkimettik emes uıymdar jáne azamattyq qoǵam ınstıtýttarynyń kúsh-jigerin biriktiredi.
Dóńgelek ústeldiń moderatory — Ulttyq komısıa tóraǵasynyń orynbasary, Ulttyq keńes múshesi, advokat jáne quqyq qorǵaýshy Aıman Ýmarova. İs-sharada sóz sóıleýshiler qatarynda QR Konstıtýsıalyq Keńesiniń tóraıymy Elvıra Azımova, Qazaqstandaǵy BUU-Áıelder qurylymynyń ókili Djeren Gúven Gúres jáneQR Adam quqyqtary jónindegi ýákili Artýr Lastaev bar.
Dóńgelek ústelde jetekshi sarapshylar men memlekettik organdardyń ókilderi óz baıandamalaryn usyndy. QR Bas prokýrorynyń orynbasary kıberzorlyqtyń qazirgi qaterleri jáne prokýratýra tarapynan qabyldanyp jatqan jaýap sharalary týraly baıandama jasady. «One-Stop-Service» jobasynyń úılestirýshisi Lázzat Rakısheva Ulttyq komısıa bastamasyn iske asyrý tájirıbesimen bólisti. Ádilet vıse-mınıstri áıelder men balalardy qorǵaýǵa qatysty jańa zańnamalyq sharalardy talqylady, al Zýlfıa Baısakova daǵdarys ortalyqtarynyń birinshi qorǵaý jelisi retindegi rólin jáne erte aralasýdyń mańyzdylyǵyn atap kórsetti. Ulttyq komısıanyń tóraǵa orynbasary Elena Tarasenko memleket, úkimettik emes uıymdar jáne halyqaralyq uıymdardyń 1325 rezolúsıasy aıasyndaǵy seriktestigi týraly aıtyp berdi, al zań ǵylymdarynyń doktory Marat Qoǵamov qylmystyq proseste áıelderdiń qatysý erekshelikterin túsindirip ótti. Baıan Jandosova zorlyq qurbandaryn qalpyna keltirý tájirıbesimen bólisti.
Arnaıy nazar reprodýktıvti densaýlyqty qorǵaýǵa, áıelderdiń ekonomıkalyq derbestigin arttyrýǵa, ákelerdi profılaktıkalyq jumysqa belsendi tartýǵa, sondaı-aq qaýipsiz qoǵam qalyptastyrýǵa arnalǵan sıfrlyq platformalardy damytýǵa baǵyttalmaq. Bir mezette vedomstvolar arasyndaǵy ózara is-qımyldy kúsheıtý jáne azamattyq qoǵam ınstıtýttarymen tıimdi áriptestik ornatý máseleleri de basty nazarda.
Ulttyq komısıanyń málimdeýinshe, zorlyq-zombylyqqa nóldik tózimdilikti qalyptastyrý — uzaqmerzimdi ári júıeli tásildi talap etetin proses. Bul baǵytta quqyqtyq mádenıetti damytý, memlekettik organdar, sarapshylar qaýymdastyǵy jáne úkimettik emes uıymdardyń kúsh-jigerin biriktirý sheshýshi ról atqarady.
Dóńgelek ústel sońynda áıelder men balalardy qorǵaý bastamalaryn ilgeriletýdegi úlesi úshin belsendi qatysýshylar men sarapshylarǵa alǵys hattar tabys etildi.
