Mádenıet jáne aqparat mınıstri, QR Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıa tóraǵasy Aıda Balaeva «Taldaý mektebi» jobasynyń IV leginiń qatysýshylarymen kezdesý ótkizdi.

Aıda Balaeva mınıstrlik pen Ulttyq komısıanyń genderlik teńdikti qamtamasyz etýge baǵyttalǵan bastamalary men jobalary týraly keńinen aıtyp berdi.

Mınıstr oń ózgeristerge qaramastan, genderlik teńdik máseleleri ózekti bolyp qala beretinin, olardy keshendi túrde qarastyrý qajet ekenin atap ótti.

İs-shara suraq-jaýap formatynda ótti. Qatysýshylar mınıstrden Memleket basshysy alǵa qoıǵan maqsattardy oryndaý úshin áıelderdiń basshylyq laýazymdardaǵy úlesin arttyrý, eńbekaqydaǵy genderlik alshaqtyqty joıý máselesi boıynsha birqatar suraqtar qoıdy. Sonymen qatar kópshilik mınıstrdiń jeke tájirıbesi men kásibı qalyptasý joly týraly da surady.

Eń bastysy – óz isińdi súıý. Eńbekqorlyq pen jaýapkershilik mindetti túrde óz nátıjesin beredi, – dep jaýap berdi mınıstr.

Aıda Balaeva basshylyq laýazymdarǵa taǵaıyndaý kezinde negizgi faktor kandıdattardyń kásibı biliktiligi bolýy kerek ekenin atap ótti. Mınıstr áıelderdiń mansaptyq ósýine teń múmkindikteri bolýy keregin, eshqandaı kedergiler men stereotıpterge jol berilmeýi tıis ekenin jáne osyndaı jaǵdaı jasaý – basty mindetterdiń biri ekenin atap ótti.

Kezdesý sońynda mınıstr qatysýshylardyń belsendiligi men konstrýktıvti suraqtary úshin alǵys aıtyp, kóterilgen máselelerdiń eskeriletinin jáne aldaǵy jumysta qoldanylatynyn aıtty.

«Taldaý mektebi» – Qazaqstan Respýblıkasy Parlamenti Senatynyń qoldaýymen iske asyrylatyn qoǵamdyq joba. Mektep memlekettik basqarý, ǵylymı-saraptamalyq qoǵamdastyq, azamattyq sektor men BAQ qyzmetindegi taldamalyq tásilderdiń sapasyn arttyrý isine úles qosýǵa baǵyttalǵan.