Búgin «Ekspo-2017» aýmaǵynda Ispanıa koróldiginiń Ulttyq kúni ótýde dep habarlaıdy Qamshy.kz aqparat agenttigi. Saltanatty is-sharaǵa Ispanıa Depýtattar kongresiniń tóraıymy Ana Pastor qatysty. İs-sharanyń resmı bóliminen keıin ıspandyqtar qonaqtarǵa belgili «Compañía Flamenca» tobynyń, «Carros de Foc» kóshe teatrynyń qatysýymen ótetin qyzyqty mádenı baǵdarlamany daıyndap otyr, sondaı-aq, «Lamanchtyq aılaker ıdalgo Don Kıhot» romany kópshilik arasynda oqylatyn bolady.
«Biz «Astana Eskpo-2017» halyqaralyq mamandandyrylǵan kórmesine qatysyp otyrǵanymyzǵa asa qýanyshtymyz. Ispanıa - jasyl energetıkany zertteý salasynda kósh bastap turǵan el. Máselen, Almerıadaǵy PSA kún elektrstansıasy kún jylýynyń energıasyn zertteý salasyndaǵy álemdik deńgeıdegi ozyq ortalyq bolyp tabylady, al CENER – jel týrbınalarynyń beriktigi men sapasyna synaq júrgizetin álemdegi tuńǵysh zerthana. Jańartylmaly energıa kózderin qoldaný salasyndaǵy sońǵy jetistikterimiz ben jınaqtaǵan tájirıbemizdi úlken maqtanyshpen tanystyryp otyrmyz», - dep atap ótti Ana Pastor.
Ispanıa pavılony kreatıvtik ári metaforalyq dızaınmen bezendendirilgen. Pavılon ortasynda úsh úı ornalasqan: «Jańartylmaly energıa kózderiniń ýaqyty» dep atalatyn birinshi úı kómirteksizdendirýge jáne jasyl energetıkaǵa negizdelgen jańa energetıkalyq úlgige ótýdiń qajettiligin kórsetedi.
«Armanshyldar, izasharlar, jańashyldar» dep atalatyn ekinshi úı jańartylmaly energetıka salasynda sońǵy onjyldyqta Ispanıada ázirlenip, endirilgen naqty jobalar men ınovasıalyq sheshimderge arnalǵan. Bul jobalardyń kóbisi energetıkany kómirteksizdendirýge baǵyttalǵan.
«Ispanıa: ǵalamsharǵa arnalǵan energıa» atty úshinshi úıde osy elde tabysty túrde endirilgen jańartylmaly taza enegıany óndirýge arnalǵan sheshimder men quraldardyń keń túrleri jaıly baıandaıtyn panoramalyq beınerolıkterden turatyn proeksıalyq shoýdy tamashalaýǵa bolady. Bul kompozısıa Ispanıa kompanıalarynyń jasampaz ári tehnologıalyq múmkindikterin, jasyl energetıka salasyndaǵy baı tájirıbesin aıshyqtaıdy.
Zal ortasynda jaıqalyp turǵan tiri aǵash adamzat mekendep jatqan «jahandyq aýyldyń» nyshany ispettes. Ol adamzatqa ǵalamsharmen úndese otyryp damýǵa kómektesetin tarazylanǵan ári turaqty sheshimderdi izdeýdiń qajettiligin baıqatady. Pavılon qurylysy men dızaınyna jumsalǵan jalpy qarjy kólemi 2 mln. eýro quraǵanyn atap ótý qajet.
«Kórme jumysynyń alǵashqy aıynda bizdiń pavılonǵa 130 myńnan asa adam kelip úlgerdi. Bizder úshin bul kórme - Ispanıanyń jel, fotoelektr jáne kún jylýy syndy jasyl energetıkadaǵy úlken suranysqa ıe bolyp otyrǵan energıa kózderin zertteý, damytý jáne endirý salasynda kósh bastaı otyryp, jańartylmaly energıa kózderin damytýda jetken sońǵy onjyldyqtaǵy jetistikterin álemge kórsetý úshin birden-bir múmkindik», - deıdi pavılon dırektory Karmen Býeno.
Inovasıalyq jobalarǵa qosa, Ispanıa kórmege kelýshilerge birqatar mádenı is-sharalardy usynyp otyr. Máselen, 17 shilde kúni Ulttyq kún aıasynda «Lamanchtyq Don Kıhot» romanynyń úzindileri orys tilinde kópshilik aldynda oqylady. Bul shyǵarmany Ispanıa pavılonynda qyzmet jasaıtyn qazaqtandyqtar oqıdy. Bul qyzyqty kostúmdi qoıylym kezinde pavılon qyzmetkerleri kórme qonaqtaryn minberge shaqyryp, romannyń bir úzindisin sahna tórinde oqýdy usynatyn bolady.
Ulttyq kún aıasynda mundaı is-sharanyń ótkiziletini kezdeısoq emes: Ispanıada jyl saıyn saıasat, sport jáne shoý-bıznes salasyndaǵy belgili qaıratkerlerdi shaqyrta otyryp «Don Kıhot» romanyn oqý dástúrge aınalǵan. Osylaısha ıspandyqtar óz dástúrlerin qurmettep, uly jazýshy Mıgel de Servantestiń rýhyn qasterleıdi.
Sondaı-aq, 17-21 shilde aralyǵynda kúnde keshke saǵat 19:00-de «Compañía Flamenca» flamenko spektakli ótetin bolady. 17-26 shilde aralyǵynda kúnine birneshe márte «Carros de Foc» kóshe teatrynyń kúndelikti qoıylymdary uıymdastyrylady.
Tamyz aıynda pavılon qala kınoteatrlarynda Ispandyq kıno festıvalin, sondaı-aq, ıspan tilin qoldaýǵa arnalǵan birqatar is-sharalardy ótkizýdi josparlap otyr.
