Halyqtyń qashanda quqyq qorǵaý salasynyń qyzmetkerlerine kóńili tolmaıdy. Kúnine qalalyq polıseılerge 4 myńnan astam qońyraý tússe, olardyń myńnan astamy rastalyp jatady eken. Degenmen, Almatyda bir táýliktiń ishinde 100-ge deıin qylmystyq oqıǵalar oryn alady. Al ishki ister departamentiniń málimeti boıynsha, bıyl kórsetkishter jaqsaryp, qylmys sany azaıdy dep otyr. Degenmen, buzaqylyq, jeńil dene jaraqattaryn salý, tonaýdyń kórsetkishteri tyıylmaı turǵan kórinedi. Ásirese, uıaly telefon urlyǵy. Byltyrdyń ózinde el kóleminde 100 myńnan astam qol, qalta telefony qoldy bolǵan. Turǵyndardyń tynyshtyǵyn buzatyn buzaqylyqtyń aldyn alý úshin taǵy bir baǵdarlama iske qosylmaq, dep habarlaıdy Qamshy.kz aqparat agenttigi.

Qalada 97 myńnan astam beıne baqylaý kameralary qoıylǵan. «Qaýipsiz qala», «Qaýipsiz aýla» syndy baǵdarlamalar aıasynda 87 myńdaı kamera ornatylǵan. Avtomatty qurylǵylardyń kómegimen bıyl 529 qylmystyq isti ashýǵa múmkindik týsa, tek 11 myńnan astam oryn alǵan ákimshilik tártipsizdik tirkelgen. Kóshedegi kamerelar arqyly jol erejesin buzǵan 10 myń júrgizýshige aıyppul júktegen.

«Almaty qalasynda oryn alǵan qylmystyń sany edáýir azaıǵan bolatyn. 7,5 %-ǵa tómendep otyr jáne de oryn alǵan qylmystardyń deńgeıi de artyp otyr. Bul qýantarlyq jaı. Búgingi tańda, Almaty polısıasy barlyq jańa tehnologıalardy, múmkindikterdi paıdalanyp qylmysqa tótep berýge múkindigi bar. Mysaly, qaraqshylyq shabýyldardyń kórsetkishi 20 %-ǵa, adam tonaýdyń kórsetkishi 13%-ǵa tómendedi»,- dedi İİD resmı ókili Saltanat Ázirbek.

Biraq qaltadaǵy ámıan men qol telefondy qaǵyp ketý kóbeıip tur. Endi aldaǵy aptadan bastap qoǵamdyq kólikterdiń kire berisine beınebaqylaý ornatylady. Pılottyq jobadaǵy alǵashqy avtobýsqa ornatylǵan kamera arqyly bir aptada 3 urlyqshy ustalǵan. Qalalyq polıseıler jan-jaqty jasaǵan jumystyń nátıjesinde aýyr qylmys sany bıyl 37,6 paıyzǵa, ortasha buzaqylyq 4,9 paıyzǵa azaıdy deıdi.

«Bıyl 4074 qylmys tirkelse, byltyr aýdandaǵy qylmys sany 4571 bolǵan. Iaǵnı, kórsetkish 10 paıyzǵa azaıdy. Aýdanda 141 aýyr qylmys boldy. Byltyr 378-ge jetken. Tonaý 13, ózgeniń múlkin ıemdený 2,6, páter urlyǵy 68, buzaqylyq 58, alaıaqtyq 28 paıyzǵa tómendedi»,- dedi Medeý aýdandyq İİB basshysy Esen Ysqaqov.

Qala boıynsha qylmystyń kóp oryn alýy jaǵynan Áýezov aýdany alda tur. Jer kólemi shaǵyn, negizinen aýqattylar turaqtaǵan Medeý aýdany da urlyq, qaraqshylyq jaǵynan alǵashqy úshtikte. Resmı málimet ishki ister organdary qyzmetkerleriniń jumysyn joǵary baǵalap, qylmys sany azaıdy dese, qoǵamdyq keńestiń baǵasy bul pikirge kereǵar.

«Halyq arasynda júrgizilgen saýalnama nátıjesinde turǵyndardyń 44 paıyzy jergilikti polıseıler para alady dep málimdedi. Sondaı-aq, Medeý aýdany ishki ister bóliminiń qyzmetkerleri turǵyndardy bopsalaý jaǵynan qalada birinshi oryn alady. Osy ýaqytqa deıin jergilikti polısıanyń 188 qyzmetkeri jaýapkershilikke tartylǵan»,- dedi Qalalyq qoǵamdyq keńestiń múshesi  Aleksandr Beláov.

Kóp qabatty úılerdi ortalyq kúzet dabylyna qosý álide kóbeımek. Qaladaǵy 111 myńnan astam ǵımarat turaqty kúzetke alynsa, avtomatty kúzetke qosylǵan jerler tonaý oqıǵasyn 44 paıyzǵa deıin azaıtýǵa múmkindik bergen. Qaladaǵy eki mıllıondaı halyqtyń tynyshtyǵyn kúzetýge táýligine 3 myńdaı polısıa jumys istese, kúnine shamamen 100 den astam qylmys tirkeledi eken.