Astanada karate-dodan jasóspirimder men eresekter arasyndaǵy qurlyqaralyq birinshilik máresine jetti. Qazaqstan quramasy jarystyń úzdik úshtigine endi, dep habarlaıdy Qamshy.kz aqparat agenttigi Astana ákimdiginiń medıa ortalyǵyna silteme jasap.
Qazaqstan quramasynyń qorjynynda 8 altyn, 6 kúmis jáne 13 qola medal bar. Jasóspirimder arasynda chempıondyq statýsqa Sofá Ǵalımzánova (54 kg deıin), Ásel Qanaı (59 kg deıin), Sofá Berýltseva (59 kg deıin), Dýlat Mamyr (70 kg deıin) jáne Nurtiles Tynysbek (76 kg) qol jetkizdi.
21 jasqa deıingi sanatta jeńiske Móldir Jańbyrbaı jetti. Eresekter arasynda altyndy elimizdiń atynan Tokıo-2020 Olımpıadasyna qatysatyn basty úmitker, Azıa oıyndarynyń altynyn alǵan aqtóbelik Andreı Aqtaýov ıelendi. Aqtyq básekede ol ırandyq Hassannıadelam Madjıdtten upaı sanymen basym tústi.
Qazaqstannyń eń reıtıńti karatısti Rınat Saǵyndyqov chempıondyq statýsyn saqtap qala almady. Fınalda Saýd Arabıasynan kelgen qarsylasyna jol berip, qurama qorjynyna kúmis ákeldi.
El quramasynyń taǵy bir kóshbasshysy chempıonat altynyna qol jetkize almady. Danıar Iýldashev 84 kelige deıingi salmaqta aqtyq básekede japondyq Ijızýke Masaıamen kezdesip, Azıa chempıony ataǵyn ýysynan jiberip aldy. Jarys qorytyndysy boıynsha kúmisti qanjyǵalady.
19 altyn medalmen Irannan kelgen karatıster Azıa birinshiliginiń kóshbasshysy atandy. Jalpy komandalyq esepte 16 altynmen Japonıa quramasy ekinshi orynnan tabylsa, qazaqstandyq qurama úshinshi satydan kórindi.
Aıta keteıik, 2016 jyly halyqaralyq olımpıada komıteti karate-dony 2020 jylǵy Olımpıada baǵdarlamasyna engizdi. Chempıonatta jınalǵan upaılar sportshylardyń tórt jyldyq basty oıyndaryna lısenzıa alý kezinde eskeriledi.
