Túrkıanyń «qara tizimine» Qazaqstan, Reseı, Saýd Arabıasy jáne basqa da elderden 50 myńnan astam azamat engen.

Bul týraly Qamshy.kz aqparat agenttigi  Sputnik málimetine súıenip habarlaıdy.

Túrkıa «qara tizim» jasady, oǵan álemniń 146 elinen 54 myńǵa jýyq azamat enip otyr. Olarǵa lańkestik uıymdarmen baılanysy úshin Túrkıa aýmaǵyna kirýge tyıym salyndy.

Túrkıanyń ishki ister mınıstrliginiń DAISH-pen kúres jónindegi baıandamasyna súıensek, “qara tizimge” Qazaqstannyń 1914 azamaty engen. Sonymen birge tizimde Saýd Arabıasy, Týnıs, Reseı, Marokko, Tájikstan, Fransıa, Irak, Ázerbaıjan jáne Belgıa azamattary bar.

“146 eldiń 53 781 azamatyna terrorıstermen baılanysyp, qaqtyǵys aımaǵynda bolýy múmkin bolǵandyqtan Túrkıa aýmaǵyna kirýge tyıym salyndy”, — dep aıtylǵan baıandamada.

Túrkıanyń Syrtqy ister mınıstrliginiń túsindirýinshe, tizimge azamattary lańkestik uıymdarmen baılanysqan jáne Sırıadaǵy qaqtyǵys aımaqtaryna barǵan memleketter kirgen.