Atajurtqa kóship kele jatyp, aqpan aıynda Maıqapshaǵaı keden beketinde 50 myń dollar shamasynda aqshasynan aıyrylǵan, kedenshiler tarapynan «kontrabandamen» aınalysty dep aıyptalǵan Gúljan Máýithannyń isin prokýratýra qysqartqany týraly keshe habarlaǵan edik.
Búgin tárkilengen aqsha ıesine tolyqtaı qaıtatyny týraly qýanyshty habar tarady. Qýanyshty habarǵa sebep bolǵan SHQO prokýratýrasynyń arnaıy qaýlysyn Facebook paraqshasynda Ularbek Dáleıuly jarıalady.
«Al, Qany bir Qazaqtarym!
Jaratýshy ıemiz Gúljan apaıdyń kóz jasyn kórdi. Ádildik ornady. SHQO prokýratýrasy resmı qaýly shyǵardy. (Olarǵa myń da bir rahmet!)
Qýanyshymyzda shek joq!
Analar jylamasyn, Elim deıtin erdiń eńsesi túspesin!», - dep jazǵan Ularbek Dáleıuly.
Tolyq mátindi SHQO Prokýratýrasy sóılesin:
«Qytaı Halyq Respýblıkasynan kelgen oralmannyń isine núkte qoıyldy
Oblys prokýratýrasy oralman Gúljan Máýithanǵa qatysty iske núkte qoıdy. Shekarada keden beketinde alynǵan aqshalaı qarajaty oǵan qaıtarylatyn bolady.
Osy jyldyń 4 sáýirinde Qytaı Halyq Respýblıkasynan Qazaqstanǵa oralmen retinde kóship kelgen Gúljan Máýithannan shekaranyń keden beketinde deklarasıada kórsetpegen 40 000 AQSH dollary alynǵan. Gúljan Máýithan Qytaıda óz úıin satyp, osy qarajatqa Astanadan úı satyp almaqshy bolǵan. Ol shekara arqyly aqshalaı qarajatty ótkizý erejelerin bilmegenin túsindirgen. Nátıjesinde, «Ekonomıkalyq kontrabanda» baby boıynsha sotqa deıingi tergeý bastalǵan.
Zaısan aýdandyq soty Gúljan Máýithandy kináli dep tanyp, 40 000 AQSH dollaryn memleket paıdasyna alý týraly sheshim shyǵarǵan. Apelásıalyq satyda sot isin júrgizý tili týraly talap saqtalmaǵandyqtan sheshim buzylǵan.
Shyǵys Qazaqstan oblysynyń prokýratýrasy osy isti muqıat zerdelep, Gúljan Máýithannyń áreketterinde qylmystyq quqyq buzýshylyqtyń quramy bolmaǵanyn anyqtady, sebebi, Gúljan Máýithan Qytaıdan aqshalaı qarajatty qupıa túrde ákelý nıeti bolmaǵan degen qorytyndyǵa keldi.
Bundaı sheshim qabyldaýǵa - egde jasynda Qytaı elinen atamekeni Qazaqstanǵa qaıtýyn maqsat etip, ómir boıy jınaǵan dúnıe múlikterin satyp, oralman mártebesin alyp, eline oralǵan G.Máýithandy «ekonomıkalyq kontrabanda» jasady dep aıyptap, onyń 40 000 AQSH dollary qarajatyn tárkileý ádiletsiz ekendigi negiz boldy.
Shyǵys Qazaqstan oblysynyń prokýratýrasy»
