Pavlodar oblysynyń ákimi Tolýbaı aýylyndaǵy 68 jastaǵy zeınetker kisige kómektesýge nıet bildirdi. Ákimge zeınetkerdiń jaǵdaıy týraly onyń kórshileri aıtyp bergen, dep habarlaıdy Qamshy.kz aqparat agenttigi Pavlodarnews.kz saıtyna silteme jasap.

Jumys babymen Pavlodar aýdandaryn sholyp júrgen oblys ákimi Býlat Baqaýaov Tolýbaı aýylyna da kelip, ondaǵy aqsaqaldarmen kezdesken. Sol kezde ákimge 68 jastaǵy Qaınygesh Aqqalýeva esimdi zeınetker jaıynda kórshileri aıtyp, onyń qazirgi tańda turyp jatqan úıi adam sengisiz jaǵdaıda ekendigin jetkizgen. Zeınetker osy aýylda birneshe jyl saýynshy bolyp jumys istegen eken. Qazir ol jalǵyz ózi turady, qart kisi bolǵandyqtan óziniń úıine qarap, úı sharýasymen aınalysa almaıdy eken.

Shamamen bir jyl buryn órttiń saldarynan zeınetkerdiń úıinde elektr toǵy ajyratylǵan.  Sonymen qatar úıiniń shatyry tesilip, sý aǵyp turady eken. Al qystyń kúni erekshe sýyq bolyp, úıdiń ishi jylynbaıtyn kórinedi.

Aýyl turǵyndary qoldarynan kelgenshe qart kisige qol ushyn sozyp, kómektesip turady. Byltyr bir kásipker zeınetkerge qysta jaǵatyn kómirin alyp beripti, al sol aýyldyń jastary jıi-jıi kelip qarıanyń aýlasyn, úıin tazartyp turady eken.

Oblys ákimi dereý isti qolyna alyp, zeınetkerge kómektesýge sheshim qabyldaǵan. Sonymen qatar árbir aýdan men aýylda jaǵdaıy joq zeınetkerler jaıynda málimet jınaýdy tapsyrǵan.

«Eger ondaı kisiler bar bolsa, biz olarǵa kómektesýimiz qajet. Resýrstardyń barlyǵyna da jetkilikti bolýyn qadaǵalaımyz. Osyndaı jaǵdaıda otyrǵan adamdardy kórsem, «Aýdan ákimi ne istep júr?» degen suraq týyndaıdy», - deıdi Býlat Baqaýov.