Búgin Astanadaǵy Ortalyq komýnıkasıalar qyzmetinde Qazaqstan Respýblıkasynyń Aqparat jáne komýnıkasıalar mınıstri Dáýren Abaevtyń qatysýymen alys-jaqyn shetelderde ómir súretin qazaqtardyń tarıhy men kúndelikti ómirleri týraly «Qıyrdaǵy qazaqtar» atty 8 serıaly derekti fılmniń túsirý jumystarynyń bastalýyna arnalǵan baspasóz konferensıa ótti, dep habarlaıdy Qamshy.kz aqparat agenttigi.
Baspasóz konferensıanyń jumysyna «Qazkontent» AQ Basqarma tóraǵasy Evgenıı Kochetov, «Qazaqstan tarıhy» ınternet jobasynyń jetekshisi Oljas Berkinbaev qatysty.
Atalǵan joba Qazaqstan Respýblıkasynyń Prezıdenti N.Á. Nazarbaev Tóraǵasy bolyp tabylatyn Dúnıejúzi qazaqtary Qaýymdastyǵynyń 25 jyldyǵyna arnalyp otyr. Derekti fılmniń maqsaty – Qazaqstan Respýblıkasynyń Prezıdenti N.Á. Nazarbaevtyń «Bolashaqqa baǵdar: rýhanı jańǵyrý» maqalasynyń aıasynda ulttyq sanamyzdy jańǵyrtý jáne tól tarıhymyzǵa tyń serpilis ákelý. Alys-jaqyn shet elderdegi qazaqtardy otanymyzǵa oralýǵa nasıhattaý.
Joba jumystary Astana qalasynda 2017 jylǵy 22-25 maýsym aralyǵynda ótken halyqaralyq Dúnıejúzi qazaqtarynyń V quryltaıynan bastaý aldy.
Konferensıa barysynda sóz alǵan Aqparat jáne komýnıkasıalar mınıstri Dáýren Abaev:
«Bul jobany Aqparat jáne komýnıkasıalar mınıstrligi Elbasy tapsyrmasyna saı qolǵa alýda. Jaqynda Memleket basshysy Dúnıejúzi qazaqtarynyń V quryltaıynda shet memleketterdegi qandastardy qoldaýǵa qatysty birqatar tapsyrma bergeni belgili. Sonyń biri – olardy tarıhı Otanyna tanystyrý, aradaǵy baılanysty kúsheıtý.Osyǵan oraı, mınıstrliktiń tapsyrmasymen «Qazkontent» AQ-nyń «National Digital History» portaly sheteldegi qandastarymyz týraly derekti fılmder serıasyn túsirýge kirisedi. Túsirilim qazaq dıasporalary shoǵyrlanǵan 8 memlekette – Reseı, Mońǵolıa, Qytaı, Ózbekstan, Tájikstan, Túrkimenstan, Iran jáne Aýǵanstan elderinde júrgiziledi. Jobada sol elderdegi qazaqtardyń turmysy, tarıhy, erekshe dástúrleri, mádenıeti qamtylýy tıis.
Bul sheteldegi qandastarymyzben aradaǵy baılanysty odan ári nyǵaıtýǵa úlken úles qosady dep senemin», – dedi mınıstr.
Túsirilim álemniń ár eline tarydaı shashyraǵan qazaqtar qonystanǵan segiz memlekette, atap aıtqanda Reseı (Astrahan, Omby, Orynbor, Qorǵan), Túrkimenstan (Túrkimenbashy, Tashaýyz, Ashhabad, Chardjoý), Ózbekstan (Bostandyq aýdany, Tashkent, Shyrshyq, Ǵazalkent), Tájikstan (Dýshanbe, Soǵdy, Taýly Badahshan, Hatlon), Qytaı (Úrimshi, Qumyl, Qaramaı, Barkól, Sháýeshek, Qulja, Morı), Mońǵolıa (Baıan-Ólgeı, Qobda, Ulan-Batyr), Iran (Gorgan, Bender-Túrkimen, Tegeran, Meshhed), Aýǵanstan (Kabýl, Qundyz) elderinde júrgiziledi dep josparlanyp otyr.
Derekti fılmdi túsirý barysynda QR SİM birlese otyryp, joǵaryda jazylǵan elderdegi QR elshilikterimen birlesken jumys atqarylady. Osy jumystardyń nátıjesi retinde joǵaryda atalǵan qalalardaǵy qazaqtardyń turmys-tirshiligin, ótken tarıhy men salt-dástúrlerin, mádenıetin kórsetetin dúnıe kórermen nazaryna usynylmaq.
Sondaı-aq, National Digital History portalynda ekspedısıa jumysynan Live rejıminde aqparat taratylyp, áleýmettik jeli paıdalanýshylary men ınternet qoldanýshylaryna tikeleı aqparat jetkiziletin bolady.
Joba qazaq halqynyń mádenıetine, tarıhyna jáne salt-dástúrlerine jańasha turǵyda qaraýǵa, sheteldegi qazaqtardyń ómirin shynaıy kórsetýge múmkindik beredi.
Sonymen qosa Mınıstr Dáýren Abaev: «Álem boıynsha shette júrgen qandastardy elge jınaǵan sanaýly ǵana memleket bar. Solardyń biri - Qazaqstan. Egemendik alǵan 26 jylda 1 mıllıonǵa jýyq qandastarymyz elge oraldy. Memleket basshysy jaqynda ótken Dúnıejúzi qazaqtarynyń 5-shi quryltaıynda «Elim degen árbir qazaqqa árqashan Qazaqstannyń esigi ashyq» dedi. Iaǵnı, kósh áli toqtaǵan joq, aldaǵy ýaqytta da jalǵasa beredi degen oıdamyz. Osy oraıda, Elbasy tapsyrmasyna saı, Aqparat jáne komýnıkasıalar mınıstrligi «Qıyrdaǵy qazaqtar» jobasyn qolǵa alyp otyr», - dedi.
