Antıterrorlyq qorǵanys talaptaryn buzǵany úshin qostanaılyq kásiporyndarǵa 3 mıllıon teńge mólsherinde aıyppul salyndy dep habarlaıdy Qamshy.kz aqparat agenttigi QazAqparatqa silteme jasap.

Qostanaı oblysynyń İİD-nen habarlaǵandaı, zań buzýshylyqtar memlekettik nysandardy, oıyn-saýyq ortalyqtary men saýda úılerin, ózge de kásiporyndardy tekserý kezinde anyqtalyp otyr. Antıterrorlyq talaptardy buzǵany úshin 9 basshy ákimshilik jaýapkershilikke tartyldy.

Qostanaı oblysynyń İİD ekstremızmge qarsy basqarma bastyǵy polısıa polkovnıgi Erbol Derbisov kez kelgen kásiporynnyń ǵımaraty antıterrorlyq talaptarǵa saı bolýy kerektigin aıtady.

«Negizgi talap sapaly ótkizý pýnktine, aqparattyq qaýipsizdik qorǵanysyn uıymdastyrýǵa, antıterrorlyq qorǵanystyń tólqujatynyń jasalýyna, profılaktıkalyq jumystardyń júrgizilip, ǵımarat ishindegi qaýipti zatty anyqtaı alatyn tehnık personalyn daıyndaýǵa qoıylady», –  deıdi polısıa polkovnıgi.

Erbol Derbisovtyń aıtýynsha, aıyppul arqalaǵan kásiporyndardyń basshylary birneshe ret eskertý jasalǵan. Eskertýdi qulaqqa ilmegen olar Ákimshilik kodekstiń 149-babyna sáıkes jaýapkershilikke tartylǵan.

«Atalǵan bap boıynsha jeke jáne laýazymdy tulǵalarǵa júz, shaǵyn kásipkerlik sýbektilerine nemese komersıalyq emes uıymdarǵa eki júz deıin, al orta bıznes sýbektilerine úsh júz, iri kásiporyndarǵa bes júz aılyq eseptik kórsetkishke deıin aıyppul salynady. Zań buzýshylyq áreketteri qaıtalanyp jatsa, jaza da qataıa túsedi», – deıdi E.Derbisov.