Qaraǵandyda kópjyldyq tarıhy bar «Shahter» fýtbol klýby satyp alý quqyǵymen senimdi basqarýǵa berý úshin, bar bolǵany myń teńgege aýksıonǵa shyǵaryldy dep habarlaıdy Qamshy.kz aqparat agenttigi  vesti.kz-ke silteme jasaı otyryp.

Qaraǵandyda Ortalyq komýnıkasıalar qyzmetinde ótken brıfıńte oblystyń memlekettik aktıvter  jáne satyp alý basqarmasynyń basshysy Murat Kádekov qazirgi sátte satý aldyndaǵy daıyndyq jumystary júrip jatqanyn málimdedi. 

«Shahter» fýtbol klýby» AQ-ny satý aldyndaǵy daıyndyq júrip jatyr – bul baǵalaýshyny anyqtaý boıynsha konkýrstyq prosedýralar ótkizý, baǵalaý boıynsha esepti usyný, veb-portalǵa salý úshin qujattar daıyndaý, tenderlik komısıa otyrysyn ótkizý», – dedi Murat Kádekov. Ol klýbtyń aýksıondaǵy bastapqy quny bir myń teńge ekenin atap ótti. Bul rette, satyp alý quqyǵymen klýbty senimdi basqarýǵa alǵan tulǵa onyń 208 mıllıon teńge kólemindegi kredıtorlyq qaryzyn jabýy tıis bolady. «Klýbtyń naqty quny 208 mıllıon teńgeni quraıdy», – dedi Murat Kádekov.