Almaty kóshelerinde turǵyndar artyq taǵamdaryn ótkizýge bolatyn tońazytqyshtar paıda bolmaq dep habarlaıdy Qamshy.kz aqparat agenttigi.

Qaıyrymdylyq aksıasy jóninde aqparatty uıymdastyrýshylardyń biri – Alıhan Baıqońyrov óziniń Feısbýktegi paraqshasynda habarlady.

«Sizder demalýǵa alys saparǵa attanǵan saıyn úılerińizde buzylyp ketýi múmkin azyq-túlik mindetti túrde qalady. Nemese merekelik keshterden soń jep taýysýyńyz múmkin bolmaıtyndaı azyq-túlik qalyp jatady, buzylǵan soń ony tastaısyzdar. Beker ysyrap... Sondaı-aq, tamaq ónimderine qatysy bar oryndardan da kúnine birneshe keli azyq-túlik beker qoqysqa ketedi», – dep jazdy Alıhan Baıqońyrov.

Atalmysh jaǵdaılardy eskergen er adam «qaıyrymdylyq tońazytqyshy» aksıasyn uıymdastyrýdy usyndy.

Alıhannyń aıtýynsha, mundaı tońazytqyshtardy ol alǵash ret Denver kóshelerinen kórgen. Ár dańǵylda, sondaı-aq, iri dúkenderdiń aldynda jaǵdaıy múshkil otbasylar men zeınetkerlerge arnalǵan tegin tamaq beretin tońazytqyshtar ornalasqan.

«Turǵyndar azyq-túlikti kóptep ákeledi jáne qashan ákelgenderin jazyp ketedi. Al jaǵdaıy joqtar tegin alyp turady. Tamasha oı! Meniń de úıimde jelinbeı qalatyn tamaqtar kóp bolady. Olardy qoqysqa tastaýǵa qolyń barmaıdy», –  dep jazdy avtor.

Tońazytqyshtar áli ornalaspaǵan, alaıda ornalastyrý jumystary júrgizilý ústinde. Alıhan Baıqońyrov tońazytqyshtardy qoıatyn yńǵaıly oryn qarastyryp júrgenderin jazdy.  Ári Almaty turǵyndarynan qaıyrymdy iske atsalysýdy surady.