SHQO-daǵy jumyspen qamtý mekemeleri halyqqa jalǵan aqparat berip kelgen. Oblystyq prokýratýra jumyspen qamtý organdarynyń múgedekterdi jumysqa ornalastyrý týraly jalǵan aqparat beretinin áshkereledi. Bul týraly Qamshy.kz aqparat agenttigi altaynews.kz málimetine súıenip habarlaıdy. 

Qadaǵalaý organy múmkindigi shekteýli jandardyń quqyqtarynyń saqtalýyna taldaý júrgizgen kezde olardy jumysqa ornalastyrý máselesiniń túbegeıli sheshim tappaǵanyn anyqtady.

Oblystyq jumyspen qamtý jáne áleýmettik baǵdarlamalardy úılestirý basqarmasy bergen aqparatqa sáıkes, aqyrǵy tórt jyldyń ishinde jumyspen qamtý oryndaryna jumysqa turý úshin 4016 erekshe jannan aryz túsken, olardyń 2241-i (55 %- dan astamy) jumyspen qamtylǵan.

Alaıda tekseris barysynda kórsetkishter meılinshe arttyrylǵany belgili boldy. Bir múgedektiń jumysqa ornalasýy birneshe adamnyń jumysqa turýy retinde esepke enip otyrǵan.

Jyl saıyn shamamen 1200-den astam múgedek jumyspen qamtýǵa muqtaj bolsa, bekitilgen kvota arqyly onyń tek 10 paıyzy (138 múgedek) ǵana jumys tapqan.

Sońǵy tórt jyl ishinde 435 múgedektiń jumysqa óz betimen ornalasqanyn atap ótý mańyzdy.
Zań boıynsha jumys berýshiler jumyspen qamtý organdaryna ár toqsan saıyn múmkindigi shekteýli jandardy jumysqa qabyldaý týraly habarlaýy qajet. Biraq is júzinde jumys berýshilerdiń 70 paıyzy (386 kásiporynnyń 271-i) jumyspen qamtý organdaryna eshqandaı málimet jibermeıdi.

Al jumyspen qamtý organdary zań talaptarynyń buzylǵanyn kóre tura atalǵan jaıttar boıynsha eńbek ınspeksıasyna shaǵymdanbaıdy. Sol sebepti de tórt jyldyń ishinde bir de bir jumys berýshi ákimshilik jaýapkershilikke tartylmaǵan.

Prokýratýra qyzmetkerleri eńbek quqy buzylǵan jaǵdaıda múmkindigi shekteýli jandar qadaǵalaý organynyń — 8 (7232) 243299 senim telefonyna habarlasa alatynyn eskertedi.