Ortalyq Afrıka Respýblıkasy kún batareıasy júıelerin belsendi túrde engizýde dep habarlaıdy Qamshy.kz aqparat agenttigi.
Bul týraly EKSPO-2017 Halyqaralyq mamandandyrylǵan kórmesi aıasynda Ortalyq Afrıka Respýblıkasynyń Ulttyq kúnin merekeleý barysynda eldiń Saýda jáne ındýstrıa mınıstrliginiń Bas saýda ınspektory Djoahım Koıagazomo málimdedi. Óz sózinde Djoahım Koıagazomo qazirgi kezde memleket energetıkany damytý salasynda belsendi jumys júrgizýde ekenin atap ótti. Onyń aıtýynsha, elde jaqyn arada úlken kún batareıalar parki salynady. Sonymen qatar, Djoahım Koıagazomo ekojúıeni saqtaý úshin jańartylatyn energıa kózderin engizý men damytýdyń mańyzdylyǵyna toqtaldy.
«Ortalyq Afrıka Respýblıkasy ekojúıeni qorǵap, ony durys basqarýdy kózdeıdi. Memleketimiz 5,4 mln. ga ekvatorlyq qalyń ylǵal ormandaryna ıe, onyń 3,5 mıllıon ga aýdany baqylanady. Jańartylatyn energıa kózderin engizý – elimizdiń damýy men ormandardy saqtaýǵa qajetti. Turaqty progres iri qalalar janyndaǵy ormandy aýdandardyń qysqarýyna ákeldi. EKSPO-2017 kórmesi jasyl energetıka salasynda tájirıbe almasýǵa múmkindik berdi», – dedi Djoahım Koıagazomo.
Óz kezeginde Qazaqstan Respýblıkasy Bilim jáne ǵylym mınıstrliginiń jaýapty hatshysy Aryn Órsarıev EKSPO-2017 kórmesine qatysýshy memleketterdiń jobalary men jetistikteri Qazaqstan úshin paıdaly ári álemdik ekonomıkanyń damýyna jáne qorshaǵan ortany saqtaýǵa yqpal etetindigine senim bildirdi.
«Bolashaq energıasy» taqyrybyndaǵy Kórme energetıkalyq resýrstardyń joıylýy jáne qorshaǵan ortanyń lastanýy máselelerin sheshýdi maqsat etken halyqaralyq qaýymdastyq úshin mańyzdy. 2013 jyly Qazaqstan jasyl ekonomıkaǵa kóshý tujyrymdamasyn qabyldady. Jyl saıyn JİÓ-niń 2% kólemindegi qarajatty «jasyl jańartýǵa» ınvestısıalaýǵa nıettimiz», – dedi Aryn Órsarıev.
Óz sózinde Aryn Órsarıev Qazaqstan Ortalyq Afrıka Respýblıkasymen maqsatty ekonomıkalyq yntymaqtastyǵyn damytýǵa múddeli ekendigin atap ótti.
