Astanada ıadrolyq qaýipsizdik máselesi qarastyrylady. Jumysyn erteń bastaıtyn 62-shi Pagýosh konferensıasy barysynda ıadrolyq qaýipsizdik tilge tıek etiledi. Ǵylym jáne jahandyq problemalar jónindegi konferensıa jumysy 25 tamyz kúni saǵat 9:00-de bastalady. QR Parlamenti Senaty men QR Syrtqy ister mınıstrliginiń qoldaýymen uıymdastyrylǵan jıynǵa álemniń 46 elinen 200-den asa delegat keledi, dep habarlaıdy Qamshy.kz aqparat agenttigi.
Tórt kúnge jalǵasatyn Pagýosh konferensıasy «Jańa ıadrolyq qaýip-qaterge qarsy is-qımyl» taqyrybynda ótedi. Sharanyń ashylýyna QR Parlamenti Senatynyń Tóraǵasy Qasym-Jomart Toqaev, Pagýosh konferensıasynyń Prezıdenti Djaıanta Danapala, BUU-nyń qarýsyzdaný máseleleri jónindegi Joǵary ókili Isýmı Nakamısý, ıadrolyq synaqtarǵa jappaı tyıym salý týraly sharty Uıymnyń atqarýshy hatshysy Lassına Zerbo qatysady. Bul týraly búgin Ortalyq komýnıkasıalar qyzmetinde aıtyldy. Konferensıanyń jumysyna arnalǵan baspasóz jıynda QR Syrtqy ister mınıstriniń orynbasary Erjan Ashyqbaev:
– 62-shi Pagýosh konferensıasynyń ıadrolyq qaýipsizdik taqyrybyndaǵy jıyny bizdiń elde ótetini beker emes. Halyqaralyq uıym Qazaqstandy sýyq qarýdan bas tartqan, beıbitshilik pen tatýlyqty ustanǵan memleket retinde moıyndaıdy, – dedi.
Sonymen qatar baspasóz jıynyna qatysqan Pagýosh konferensıasynyń Prezıdenti Djaıanta Danapala uıymnyń tarıhy men jumysyna toqtaldy.
1957 jyly álemde ıadrolyq soǵystyń qaýip-qaterlerin talqylaǵan ǵalymdardyń birinshi halyqaralyq kezdesýi Kanadanyń Pagýosh qalasynda ótken. Qalanyń qurmetine atalǵan uıym halyqaralyq statýsqa ıe.
Astanada ótkiziletin Pagýosh konferensıasynyń nátıjesinde «Astana deklarasıasy» qabyldanady dep kútiledi.
