Búgin, 24 tamyzda QR Din isteri jáne azamattyq qoǵam mınıstri Nurlan Ermekbaev EQYU Parlamenttik Assambleıasynyń tóraǵasy Avstrıa Respýblıkasy Parlamenti Ulttyq Keńesiniń depýtaty Krıstın Mýttonenmen kezdesti dep habarlaıdy Qamshy.kz aqparat agenttigi.  

Nurlan Ermekbaev kezdesý barysynda mınıstrliktiń atqaryp otyrǵan qyzmeti týraly jáne konfesıaaralyq qatynas ornatýda Qazaqstannyń jetken jetistikteri jaıly sóz qozǵady.

«Qazaqstan etnokonfessıalyq quramymen erekshelenedi. Elimizde 100-den asa ózge etnos ókilderi turyp jatyr. Bul rette qazaq eliniń kópkonfessıaly qoǵamda tatýlyqty nyǵaıtý, qaýipsizdik pen beıbitshilikti qamtamasyz etý turǵysynda ózindik biregeı tájirıbesi bar. Elimizdiń osynaý tájirıbesi álemdik qaýymdastyq aldynda zaıyrly memlekettiń turaqty damý modeli retinde qabyldandy», –dep atap ótti mınıstr Nurlan Ermekbaev.  

Din isteri jáne azamattyq qoǵam mınıstri qabyldanǵan din salasyndaǵy memlekettik saıasat tujyrymdamasyna jáne Mınıstrlik ázirlep jatqan Zań jobasynyń mańyzdylyǵyna aıryqsha toqtalyp ótti. 

EQYU Parlamenttik Assambleıasynyń tóraǵasy Krıstın Mýttonen hanym memleket pen dinı uıymdary suhbatynyń qazaqstandyq tájirıbesine qyzyǵýshylyq bildirdi. Ulttyq dástúrdi jańǵyrtý jáne dinı ekstremızmniń kórinisi men jat ıdeıalarǵa qarsy turýdaǵy memlekettiń zaıyrlylyq qaǵıdalaryn nyǵaıtý jumystaryn joǵary baǵalady.

Kezdesý barysynda taraptar áriptestikti damytýdyń perspektıvalyq baǵyttaryna jáne jaqynda ǵana EQYU Parlamenttik Assambleıasy aıasynda qurylǵan terorızmge qarsy is-qımyl jónindegi Komıtetimen birlesip jumys isteýge daıyn ekendikterin bildirdi.    

Kezdesýge sondaı-aq, EQYU Parlamenttik Assambleıasynyń bas hatshysy Roberto Montella jáne Avstrıanyń Qazaqstandaǵy Elshisi Gerhard Saıller qatysty.  

Esterińizge sala ketsek, bıylǵy jyly Qazaqstannyń Eýropadaǵy qaýipsizdik jáne yntymaqtastyq uıymyna qatysýshy memleket retinde qabyldanǵanyna 25 jyl tolyp otyr.