Oral qalasynda ótken «Bolashaqqa baǵdar: jastardyń jetistik joly» aımaqtyq jastar forýmynda oblystyq jastar uıymdary atynan sóz alǵan Jánibek aýdandyq «Aqbastaý» jastar qoǵamdyq birlestiginiń tóraǵasy Rýslan Nuralıev óńirde «Rýhanı jańǵyrý» baǵdarlamasyn iske asyrýǵa jastardy tartý maqsatynda belsendi jastar men jastar uıymdaryn biriktiretin «Elim meniń» jastar koalısıasyn qurýdy usyndy.

Atalǵan sharaǵa qatysqan  70 delegat ártúrli salanyń ókilderi. Onyń ishinde respýblıkalyq jáne aımaqtyq jastar uıymdary kóshbasshylary, joǵary oqý oryndary ózin-ózi basqarý uıymdary músheleri, jas jýrnalıser, ataqty sportshylar, tanymal blogerler, eriktilermen qatar, Atyraý, Aqtóbe, Mańǵystaý oblystary jastar  ókilderi de bar. 

Forým jumysyna qatysqan oblys ákimi Altaı Kólginov delegattarǵa Memleket basshysy N.Á.Nazarbaev «Bolashaqqa baǵdar: rýhanı jańǵyrý» atty maqalasynda «Rýhanı jańǵyrý» baǵdarlamasynyń quramdas bóligi bolyp tabylatyn «Týǵan jer» baǵdarlamasy jalpyulttyq patrıotızmdi, týǵan jerge, ósken aýylǵa, qala men óńirge degen súıispenshilikti qalyptastyrýǵa baǵyttalatynyn atap ótip, ár salada el damýyna óz úlesterin qosyp júrgen Muhtar Mankeev, Tursynbek Qabatov, Alpamys Sharımov syndy batysqazaqstandyq jastardyń qyzmetin úlgi etti.

Sondaı-aq, «Jasyl El» jastar eńbek jasaqtarynyń respýblıkalyq shtaby jetekshisi Tohtar Bolysov, «Qazaqstan stýdentteri Alánsy» respýblıkalyq qozǵalysy kóshbasshysy Ilás Tústikbaevtar óńir jastaryna «Rýhanı jańǵyrý» baǵdarlamasy aıasynda jańa jobalardy birigip júzege asyrýǵa shaqyrsa, óz kezeginde sóz alǵan jas ónerpaz Marına Bıgalıeva jas urpaqqa taǵylymy mol Aqjaıyq óńirindegi tarıhı oryndar týraly mektep oqýshylary men stýdentter úshin smartfondarǵa arnalǵan arnaıy mobıldi qosymsha, vırtýaldy elektrondy ólketaný kitapshasyn jasaýdy usyndy.