Jańa oqý jylynyń qarsańynda Almaty oblysy Jambyl aýdanynda 1200 oryndyq jańa mektep paıdalanýǵa berildi. Elbasynyń "Nurly jol" baǵdarlamasy aıasynda iske qosylǵan bilim shańyraǵynyń ashylý saltanatyna Almaty oblysy ákimi Amandyq Batalov qatysyp, turǵyndar qýanyshyna ortaqtasty.
Almaty oblysynyń basshysy Amandyq Ǵabbasuly ustazdar men oqýshylardy jáne ata-analardy jańa mekteptiń ashylýymen quttyqtady. Halyqtyń paıdalanýyna berilip otyrǵan bul ıgilik Elbasy Nursultan Nazarbaevtyń salıqaly saıasatynyń arqasynda jáne memlekettik baǵdarlamalardy tıimdi júzege asyrýdyń nátıjesinde bıylǵy jyldyń ózinde oblysta 49 000 búldirshinniń 1 synyp tabaldyryǵyn attaıtynyn jetkizdi.
"Osy jyly oblysta 49 myń bala birinshi synypqa barady. Óńirimizde 35 mektep salynyp jatyr. Sonyń 24 mektebin Bilim kúni, qalǵanyn jyl aıaǵyna deıin ashatyn bolamyz. Jańa oqý jylyn jańa ǵımaratta bastaǵaly otyrǵan sizder qandaı baqyttysyzdar. Osyndaı jaǵdaı jasalýyna jaýap retinde jaqsy oqyńdar. Uzynaǵash aýylyndaǵy orta mektep sizderdiń bilimdi azamat bolyp qalyptasýlaryńa jol ashsyn. Ustazdar men ata-analaryńdy únemi úzdik baǵamen qýantyp júrińizder", - dedi oblys ákimi.
Ata-analar atynan ardager ustaz Altynjan Núsipálıeva Elbasynyń salıqaly saıasatyn júzege asyryp otyrǵan oblys basshysyna, aýdan atqaminerlerine alǵys aıtty. Ásem ǵımarat turǵyzyp, halyqtyń ıgiligine usynǵan qurylystyń bas merdigeri "Rıgolıt" jaýapkershiligi shekteýli seriktestiginiń dırektory Seıdýla Sarsekov mektep dırektory Serik Tilepbergenovke nysannyń sımvolıkalyq kiltin tapsyrdy. Aýdannyń aıtysker jas aqyny Aıtýǵan Jetebaev dombyramen arnaý aıtty. Aýdandyq máslıhat depýtaty, aýdandyq kásipodaq uıymynyń tóraǵasy Áskerbek Abaev kópshilikke bata berdi. "Jas ulan" oqýshylar úıiniń jas bıshileri bı bılep, birinshi synyp tabaldyryǵyn attaǵaly otyrǵan bir top búldirshin ortaǵa shyǵyp, óleń oqydy.
Oblys ákimi Amandyq Batalov, máslıhat depýtaty Áskerbek Abaev jáne ardager-ustaz, ata-ana Altynjan Núsipálıeva lenta qıý rásimin oryndap, ájeler shashý shashty. Oblys basshysy bastaǵan qurmetti qonaqtar mektep ishimen tanysty. Zamanaýı úlgide boı kótergen bilim ordasyna 1 mlrd. 924 mıllıon teńge jumsalǵan. 15 myń sharshy metr ǵımarattyń ishi qajetti qural-jabdyqtarmen jaraqtalǵan. Eki sportzal bar. Onyń biri 168 sharshy metrlik gımnastıka zaly, ekinshisi 648 sharshy metr voleıbol, basketbolǵa arnalǵan. Ǵımaratta barlyq materıaldyq-tehnıkalyq bazamen qamtylǵan 60 oqý kabıneti, sonyń ishinde arnaıy qural-jabdyqtarmen jabdyqtalǵan 2 hımıa, 2 fızıka, 2 bıologıa, 2 LMK, 4 ınformatıka kabınetteri bar. Sonymen qatar 2 kitaphana, 2 tehnologıa kabıneti, 230 oryndyq asqanasy da bar. Tıisti pán kabınetteri, kitaphana, sheberhana bar. Mektep aýlasynyń jalpy jer kólemi 4 gektar quraıdy. Búgingi kúni oqýshylar sany - 850. Oqýshylar 100 paıyz oqýlyqtarmen qamtamasyz etilgen.
Aýdan ortalyǵynyń shetinde keıingi jyldary jańa turǵyn úıler oramynyń paıda bolýymen birge áleýmettik nysandarǵa degen qajettilik te týyndaǵan bolatyn. Ony sheshýdiń joldary birtindep júzege asyrylyp keledi. Sonyń biri osy bilim uıasynyń qoldanysqa berilýi. Jalpy, bıyl aýdan boıynsha bes mektep ǵımaraty boı kóterdi.
