Jýyrda Taldyqorǵan qalasynda turmystyq qatty qaldyqtardy qabyldap, suryptap jáne óńdeıtin zaýyt ashylady.
Jaqyn arada iske qosylatyn zaýyt qurylysy ótken jyly bastalǵan. Qatty turmystyq qaldyqtardan ónim óndiretin óndiris oryny Taldyqorǵan-Úshtóbe baǵytyndaǵy tas joldyń boıynda ornalasqan. Onyń jalpy aýmaǵy 3.5 gektar jerdi alyp jatyr. Qatty turmystyq qaldyqtardy qaıta óńdeý zaýytynyń qurylysyna 1,4 mıllıard teńge qarajat bólingen. Al ónim óndirý qýattylyǵy jylyna 100 tonnany quraıdy. Qazirgi tańda zaýytta qoqys óńdeıtin keshenniń túrli tehnıkalyq qural-jabdyqtary tolyǵymen qamtamasyz etilgen. Zaýyt ornalasqan polıgon aýmaǵy "ADAL DAMU CAPITAL" JSHS-ǵa 10 jylǵa jalǵa berilgen.
Qaıta óńdeý boıynsha "ADAL DAMU CAPITAL" JSHS kásiporynnyń qýattylyǵy jylyna - 100 myń tonna.
Zaýyt jumysy úsh kezeńnen turady. Birinshi kezeńde qatty turmystyq qaldyqtardy suryptaýǵa arnalǵan qoqysty qaıta óńdeıtin keshendi jáne qaıtalama shıkizatty óndirýge arnalǵan sehty paıdalana otyryp, jumys jasaıdy. Al ekinshi kezeńde boıynsha qatty turmystyq qaldyqtardyń organıkalyq fraksıasyn qaıta óńdeý boıynsha bıogazdy keshen qurylysymen qoqysty óńdeıdi. Mundaǵy óndiris qýattylyǵy jylyna 18 myń tonna gaz.
Sonymen qatar zaýyttyń úshinshi kezeńinde organıkalyq qaldyqtardan bıogýmýs óndirýge arnalǵan vermıfabrıka qurylysy jumys isteıtin bolady..
"Qazir zaýyt óz jumysyn bastaýǵa daıyn. Barlyq tehnıka jumyldyrylǵan. Qurylǵylar qaǵaz, polıetılen bótelkelerin jáne qoqys qaldyqtaryn jik-jigimen toptastyryp shyǵarady. Basqalary óńdeý kásiporyndaryna, al qaldyqtar polıgonǵa jóneltiledi. Keıin ol qaldyqtardy da iske jaratatyn bolamyz. Osyny istiń joǵary deńgeıde iske asýyna kómektesken óńirlik ákimdikke aıtar alǵysym sheksiz. Birlese istegen jumystyń berekesin biz ǵana emes, oblys turǵyndary da kóretin bolady. Qoqys óńdeý "jasyl ekonomıkaǵa" kóshýdiń mańyzdy sektorlarynyń biri.
Qazir ekologtar qorshaǵan ortaǵa barynsha kóńil bólip jatyr. Menińshe, árbir turǵyn qorshaǵan ortanyń tazalyǵyna bir kisideı atsalysýy kerek. Osy máseleni alǵa tarta otyryp, biz osyndaı zaýytty iske qosýdy jón dep sanadyq. Zaýyt iske qosylysymen biz birden 170 adamdy turaqty jumyspen qamtamasyz etemiz. Bizdiń negizgi qurylǵylarymyzdyń barlyǵy evropalyq úlgidegi eń myqty ári zamanaýı qurylǵylar. Sapasy da jaqsy. Aldaǵy ýaqytta álem boıynsha ozyq úlgidegi jańa tehnologıalardyń jelisimen jabdyqtalǵan tehnıkalardy alatyn bolamyz", - deıdi "ADAL DAMU CAPITAL" JSHS basshysy Erlan Dúısebaev.
Búgingi tańda zaýytta otyzǵa jýyq adam jumys isteıdi. Zamanaýı qurylǵylardyń tilin olar qazirdiń ózinde meńgerip alǵan. Bolashaqta nátıjeli jumys isteýge daıyn jumysshylar jumysqa ornalasqanyna sheksiz rıza. Jaıdarman jańalyqtan qulaǵdar bolǵan jetisýlyqtardyń qýanyshynda shek joq. Ásirese, búgingi kúnniń eń ózekti máselesine aınalǵan turmystyq qaldyqtardy qaıta óńdeý jumysynyń kún saıyn jandanyp, damyp kele jatqany kóńilge qýanysh syılaıdy. Al jańa zaýyt oblystaǵy jumyssyzdyq deńgeıiniń sál de bolsa azaıýyna úles qosatynyn erekshe atap ótken jón.
