Taldyqorǵan qalalyq ákimdiginiń, Bilim bóliminiń jáne demeýshilik kórsetken jeke kásipkerlerdiń uıymdastyrýymen taldyqorǵandyq 40 oqýshy Qapshaǵaı qalasyndaǵy "Báıterek" demalys aımaǵyna tynyǵýǵa attandy.
Bir jylǵy ýaqyttyń basym kópshiligin mektepte ótkizetin oqýshylar jazǵy demalys kúnderin asyǵa kútetini belgili. Sondyqtan da, oqýshylar úshin eń qyzyqty mezgil - jaz maýsymy. Úsh aı demalys mezgilinde balalar alańsyz asyr salyp oınap, bir jasap qalary anyq. Demalysqa shyqqan olardyń biri jazǵy lagerlerde demalsa, endi biri qala aralap, saıahattaǵandy unatady. Al, keıbireýleri jeke sharýashylyqta eńbek etip, tabys tapqandy qalaıdy. Qalaı desek te, jaz boıy balalardyń kózden tasa bolmaı, ýaqyttaryn tıimdi ótkizýine tek mektep qana emes, ata-ana, jalpy qoǵam bolyp atsalysýymyz qajet. Alaıda, balasynyń demalysyn kóńildi ótkizýge jaǵdaı jasaı almaıtyn da otbasylar qoǵamda joq emes. Osyndaı olqylyqtyń ornyn toltyrý maqsatynda jyl saıyn taldyqorǵandyq oqýshylardyń demalysy arnaıy qalalyq ákimdiktiń basty nazarynda bolady. olardyń jazǵy demalysty kóńildi, qyzyqty ári áserli etip ótkizýleri úshin arnaıy jospar qurylady. Jyl saıyn eń birinshi kezekte áleýmettik jaǵdaıy az qamtylǵan, kóp balaly otbasynyń jáne qorǵanshylyq pen qamqorlyqtaǵy balalar túrli demalys sharalarynyń basty keıipkerine aınalady.
Bıyl da jyl saıynǵy dástúr boıynsha ıgi ister atqarylýda. Sonyń jalǵasy retinde qyryq bala qapshaǵaıǵa demalýǵa jolǵa shyqty. Oqýshylardyń qaýipsizdigi úshin arnaıy jedel járdem brıgadasy men jol-patrýldik polısıasy ekıpajy jumyldyrylǵan. Munda balalar ártúrli qyzyqty sharalarǵa qatysyp, oı-óristerin damytyp, tanymdyq dúnıelermen tanysady.
"Jalpy, jazǵy demalys bastalǵaly beri balalardyń ýaqytyn tıimdi ótkizý úshin ıgi jumystar atqarylýda. Qala ákimdiginiń, demeýshilik kórsetetin jeke kásipkerlerdiń qoldaýymen oqýshylarymyz jaqsy demalys aımaqtaryna barýda. Olardyń baldaı tátti balalyq shaqtary tek qyzyqqa toly bolýy kerek. Búgingi jas urpaq erteńgi bizdiń bolashaǵymyz. Sondyqtan da, bala ómirine tek ata-ana, mekteptegi ustazdar ǵana emes búkil qoǵam bolyp alańdaýymyz kerek. Oqýshylarymyzdyń jyl saıynǵy jazǵy demalystaryn qyzyqty ótkizýdi dástúrge aınaldyrýǵa tyrysamyz. Ol bizdiń negizgi mindetimiz", - deıdi Taldyqorǵan qalalyq bilim bóliminiń basshysy Jandos Joldyhanov.
"Men únemi saparǵa shyǵýdy armandaıtynmyn. Bolashaqta saıahatshy bolym keledi. Ásirese, dostarymmen birge qydyrǵandy unatamyn. Sol armanym búgin oryndaldy. "Qapshaǵaıǵa demalýǵa barasyńdar" degen habardy estigende qatty qýandym. Qýanyshym qoınyma syımaı, týystarymnyń bárine osy habardy jetkizip shyqtym. Eki kún boıy demalýǵa qajetti barlyq zattarymdy jınastyrdym. Bul men úshin eń keremet jazǵy demalys bolǵaly tur. Oqý jyly bastalǵanda jazatyn shyǵarmanyń da taqyryby daıyn. Osyndaı keremet kúndi bizge uıymdastyrǵan qalamyzdyń ákimine, aıaýly ustazdaryma, qamqor jandarǵa úlken rahmet aıtamyn", - deıdi mundaı demalysqa alǵash ret bara jatqan kóp balaly otbasynyń tuńǵyshy Asqar Qanatuly. Bilim bóliminiń málimetine súıener bolsaq, osy ýaqytqa deıin taldyqorǵandyq oqýshylardyń 90 paıyzy jazǵy demalyspen tolyqtaı qamtyldy. Oqý jyly bastalǵansha kórsetkish 100 paıyzǵa jetkizilmek.
