Bireýler úshin áleýmettik jeli – ótiriktiń mekeni: ol jerde adamdar tabysty ári aqyldy adamnyń betperdesin kıip alyp túrli kóz tartarlyq sýretter salyp, aqyldy áńgimeler aıtady. Olar muny qalypty jaǵdaı dep qabyldaıdy. Alaıda, meniń oıym múlde basqasha, áleýmettik jeli árkimdi sheksiz qoǵamnyń bir bóligi bolýǵa shaqyryp, álemdi túbegeıli ózgertti.
Facebook jelisinde paraqshany tek shynaıy bolý úshin ashtym. Bul ómirde kóptegen máseleler týyndaýy múmkin, alaıda ótirik – eshkim de qutylyp shyǵa almaıtyn qaqpan bolyp tabylady. Men bir qaterli dertpen kúresýge májbúr boldym, Jaratqan sizderdi ondaı sumdyqtan saqtasyn.
Akademık atam Muhtar Álıev kóz jumǵannan soń bir jarym aıdan keıin Avstrıa túrmesinde ákem Rahat Álıev óz-ózine qol jumsap, qaıtys boldy. Ómir maǵan kútpegen jerden eki birdeı soqqy jasady. Jurttyń bári baılyq pen baqytqa masattanyp ómir súretin adam retinde tanıtyn Aısultan álemdegi eń baqytsyz adamǵa aınaldy. Mundaı ýaqytta aıaq-qolyńdy kesip alsa da báribir, tek janyńdy aýyrtatyn mundaı qasiretti shekpesem eken dep oılaısyń.
Búkil otbasym meni qoldaýǵa tyrysty. Atam Nursultan Nazarbaev erekshe qamqorlyq tanytty. Bir eldiń prezıdenti kúndiz 17 mıllıon adamnyń máselesin sheshse, keshke barlyq ýaqyty men nazaryn maǵan aýdardy. Ol kezde men atamnyń maǵan qoldaý kórsetý úshin qanshalyqty kúsh-jigerin sarp etkenin túsine almadym. Sondyqtan da bolar ol ýaqyttarda úlken qatelikke boı aldyryp, aqymaqtyq jasadym. Eń úlken qateligim – esirtkimen janyma tynyshtyq izdedim.
Qoǵam úshin nashaqorlyq – úlken másele. Al adam úshin ol qaterli dert. Alǵashynda álem úlde ózgerip, aınalań nurlana bastaǵandaı kúı keshesiń, barlyq máseleleriń sheshilip, bárin umytqandaı bolasyń, biraq ol tek bastapqy ýaqytta ǵana. Keıinnen esirtki adam aǵzasyn ýlap, qaterli dertke shaldyqtyrady. Esirtkige táýeldi bolyp qalǵan adamdar tek ólim arqyly odan qutylady jáne de mundaı ý adam janyn emdemeıdi.
Bir múshesi esirtkige táýeldi bolǵan otbasy únemi qorqynysh ústinde bolady eken. Endi ne bolady? Ne isteımiz? Kórshiler ne oılaıdy? Jumysta ne aıtady? Qorqynysh sezimi adamdardyń qarym-qatynasy buzyp, jalǵyzdyqqa alyp barady jáne úmit otyn óshiredi eken. Meniń otbasym da alǵashynda qoryqqan bolatyn. Alaıda, eń bastysy, men ózimniń bul is-áreketimdi atama aıtyp, kinámdi moıyndadym. Bálkim, meniń atamnyń ornynda basqa bir Prezıdent bolǵanda ol bul máseleni jyly jaýyp qoıýǵa tyrysar ma edi?! Alaıda Nursultan Nazarbaev ondaı adam emes. Onyń eń birinshi aıtqany: «Shynshyl bolǵanyń úshin jaraısyń. Iá, óte qaýipti dert, alaıda sen bul dertke shaldyqqandardyń eń birinshisi nemese eń sońǵysy emessiń. Ony jeńip shyǵýyńa kúshiń jetedi» - dedi. Áńgime barysynda bul dertti qalaıda jeńip shyǵyp, zulymdyqty meıirimdilikke almastyrýǵa ýáde berdim. «Aısultan maǵan ýáde berse, ol ony únemi oryndaıdy», - dep salmaqty túrde atam jaýap berdi.
Men oǵan ómir boıy qaryzdarmyn. Shyndyǵyn aıtqanda, ol meni eki ret qutqaryp qaldy. Tek sol kezde muny túsinýge aqylym men tájirıbem jetpegen eken. Qazir jaqyn adamdarym meniń qasymda, men qoldaý men senimge toly otbasyda ómir súrip jatyrmyn. Bul – óte mańyzdy.
Bul dertti tek ózińniń erik jigerińmen jeńip shyǵa almaısyń. Bul dertten tolyqtaı aıyqtyratyn dári áli jasalmaǵan. Qanshama otbasy osy ýly derttiń saldarynan qurdymǵa ketti, sol sebepti de qazir ashyq jazyp otyrmyn. Mundaı jaǵdaıdan shyǵatyn múmkindik bar jáne men ony bile tura bólispeı otyra almaımyn. Meniń bul jazbam keminde bir adamdy jaman joldan tyısa, keminde bir otbasyny bul dertten qutqarsa, demek men beker jazbaǵanym.
Men budan aıyǵýdyń jolyn taptym, eń aldymen maǵan Alla kómektesti. Ómirinde nashany tatyp kórgen adam meniń ne jaıly jazyp otyrǵanymdy túsinedi. Bul iste kináli joq, tek japa shegýshiler ǵana bar. Árıne, kem tustary da jeterlik. Alaıda, nashaqorlyqpen kúresý kerek, biraq nashaqor dertine shaldyqqandarmen kúresý – qylmys ekendigin úlken senimmen aıta alamyn.
Jyl saıyn mıllıondaǵan adamdardyń ómirin jalmaǵan bul dert ár elde kóbeıip, ósip kele jatyr, sebebi adamdar bul jaıynda aıtýǵa qorqady. Ótirikshiler tek baı-baǵlandar men áleýmettik jaǵdaıy jaqsy adamdar ǵana nashaqor bolady dep jar sala aıtady. Sol sebepti de qoǵam olarǵa eshqandaı aıaýshylyq tanytpaıdy. Nashaqorlyq - tek jaman adamdardyń janyn alatyn qaıyrymdy is emes, ol qoly jetkenniń bárin jutyp alady. Sol sebepti de bul jaıynda ashyq túrle aıtý meniń paryzym dep bilemin. Al, áleýmettik jeli muny elge taratýdyń eń tıimdi joly, sol úshin de qýanyshtymyn.
Tek aıtyp qana qoımaı, qandaı da bir is jasaýǵa múmkindigim bolady dep úmittenemin. Bul máselege qatysty oıymda birshama josparlar bar, dál qazirgi ýaqytta nashaqorlyqpen kúres júrgizetin qaıyrymdylyq qor ashý ústindemin. Sol iske jumyldyratyn bilikti mamandardy izdep, meniń bastamama kómektesetin adamdardy izdeýdemin. Bul dertke shaldyqqan árbir adamǵa kómektesýge tyrysamyn, sebebi olardyń janyn men túsinemin. Eń bastysy ondaı kezeńde ózińniń jalǵyz emes ekendigińe senimdi bolý qajet jáne de sen bul dertke shaldyqqandardyń eń birinshisi de, eń sońǵysy da emestigińdi uǵynǵan jón. Qazirgi tańda adamdar nashaqorlyqpen kúres júrgizýde jaqsy tájirıbe jınap alǵan. Men Narcotics Anonymous qoǵamdastyǵyna alǵysymdy bildiremin.
Ózińmen kúresý qashan da qıyn, men úshin bul kúres eń aýyr da qıyn kúres boldy. Bárine qolyńdy bir siltep, berile salý qajet pe, álde bar kúsh-jigerińdi jınap aıaǵyna deıin kúresý kerek pe degen eki oıdyń ortasynda qaldym. Bul – naǵyz ishki jıhad. Qýanyshyma oraı, úmit sáýlesi árqashanda keýdeńdegi qarańǵylyqty jeńip shyǵady.
Aısultan Nazarbaevtyń Facebook paraqshasynan alyndy
