QR IDM málimetteri boıynsha, búgingi tańda Memleket basshysy 2020 jylǵa deıin qoıǵan mindet merziminen buryn oryndaldy. Máselen, 2015 jyldyń qorytyndysy boıynsha, elimizdiń JİÓ syıymdylyǵy 2008 jylǵy deńgeıden 28,2%-ǵa tómendegen. Qazirgi energıa únemdeý júıesiniń negizi 2012—2015 jyldary qalandy. Tolyq normatıvtik-quqyqtyq baza qalyptasty, Ulttyq damý ınstıtýty aıqyndaldy, Japonıa tájirıbesi boıynsha energıa únemdeý júıesiniń negizgi elementi – Memlekettik energetıkalyq tizilim jasaldy. Búginde onda 5 myńnan astam uıym qamtyldy. 

2016 jyly MET sýbektileriniń energıa resýrstaryn jalpy tutynýy 49 mln tonna shartty otyndy qurady. Bul elimizdiń jalpy energıa tutynýynan 38% jáne zańdy tulǵalardyń jalpy tutynýynyń shamamen jartysyn quraıdy.

Bekitilgen josparlardy taldaý qorytyndylary boıynsha 2015–2016 jyldary MET sýbektileriniń energıa únemdeýge 178 mlrd. teńgeden astam ınvestısıa salǵanyn atap ótýge bolady. 2020 jyldyń sońyna deıin taǵy 200 mlrd. teńgege jýyq qarjy ınvestısıalaý josparlanyp otyr.

«Jergilikti atqarýshy organdardyń energıa únemdeý saıasatyn júzege asyrý boıynsha jaýapkershiligin arttyrý maqsatynda Prezıdenttiń 2010 jylǵy 19 naýryzdaǵy № 954 jarlyǵymen bekitilgen sáıkes krıterıılerdi ortalyq memlekettik jáne jergilikti atqarýshy organdardyń qyzmetiniń tıimdiligin jyl saıynǵy baǵalaý júıesine engizý jón dep sanaımyz», – dep atap ótti J. Qasymbek.

Ult josparynyń 59 qadamyn júzege asyrý aıasynda energıa únemdeýge yntalandyrý maqsatynda energıa servıstik qyzmetter naryǵyn damytý jumystary júrgizilip jatyr. IIDMB aıasynda jylý ustaǵysh materıaldardy, energıa únemdeıtin shamdardy, energıa tıimdi elektr jabdyqtaryn shyǵarý boıynsha birqatar jobalar júzege asyryldy.  

Taıaý jyldarǵa vedomstvonyń aldynda eki iri mindet tur. Birinshiden, energıa únemdeýge yntalandyrý tetikterin keńeıtý qajet. Ekinshiden, energıa únemdeý salasyndaǵy memlekettik retteý júıesin jetildirý kerek, ol jergilikti atqarýshy organdardyń energıa únemdeýdiń aımaqtyq saıasatyn júzege asyrý boıynsha róli men jaýapkershiligin arttyrýdy; memlekettik baqylaý tıimdiligin kóterýdi qarastyrady.  

«Jalpy, joǵaryda atalǵan mindetterdi júzege asyrý energıa únemdeıtin tehnologıalardy engizýge jáne ekonomıkany jańǵyrtýǵa úlken serpilis beredi, nátıjesinde, bizdiń elimizdiń damyǵan 30 eldiń qataryna enýine jol ashady», – dep túıdi J. Qasymbek.

Sonymen qatar otyrys kezinde Atyraý oblysynyń ákimi Nurlan Noǵaev pen Aqtóbe oblysynyń ákimi Berdibek Saparbaev sóz sóıledi. 

QR Premer-mınıstri Baqytjan Saǵyntaev energıa tıimdiligi salasynda qoıylǵan mindetterge qol jetkizý úshin QR ınvestısıalar jáne damý mınıstrligine energetıka, aýyl sharýashylyǵy mınıstrlikterimen birlesip, ónim birligin óndirýdegi energıa tutyný normatıvterin belgileý máselesin pysyqtaýdy tapsyrdy. 

Sondaı-aq árbir jekelegen kásiporyn úshin energıa syıymdylyǵyn jyl saıyn tómendetip otyrý máselesin pysyqtaý júkteldi. Budan ózge, ulttyq ekonomıka mınıstrligine QR ınvestısıalar jáne damý mınıstrligimen birlesip energıa únemdeý saıasatyn júzege asyrý boıynsha krıterııdi ortalyq jáne jergilikti atqarýshy organdardyń qyzmetiniń tıimdiligin baǵalaý júıesine qosý tapsyryldy.