Almaty oblysy Qarasaı aýdanynda sáýleti qaıtalanbas erekshe "Batyr babalar" memorıaldy kesheni ashyldy. "Rýhanı jańǵyrý" baǵdarlamasy aıasynda boı kótergen nysandy oblystyq ákimdik pen óńir mesenattary birlesip atqardy. Jemisti jumystyń saltanatty ashylýyna, qarasaılyq jurtshylyqtyń qýanyshyn bólisýge oblys ákimi Amandyq Batalov arnaıy qatysty.
Jınalǵan kópshilikti "Batyr babalar" memorıaldy kesheniniń ashylýymen quttyqtaǵan óńir basshysy "Rýhanı jańǵyrý" baǵdarlamasyn júzege asyrý aıasynda atqarylǵan mańyzdy jobalardyń biri ekenin atap ótti.
"Memleket basshysy Nursultan Ábishuly Nazarbaev atap ótkendeı, el tarıhyn, batyr babalarymyzdyń esimin jadymyzda ustaý erteńimiz úshin óte mańyzdy. Búgingi ashylyp otyrǵan memorıaldy keshenniń jetisýlyq óskeleń urpaqty otansúıgishtikke tárbıeleýdegi alar orny erekshe bolatyndyǵyna senim bildiremin", - dedi aımaq basshysy Amandyq Ǵabbasuly.
Ystyq yqylastan keıin oblys ákimi keshenniń saltanatty túrde lentasyn qıý rásimine qatysty.
Mesenat, general-maıor A. Shpekbaev, Qarasaı aýdanynyń Qurmetti azamaty S. Jylqybaev pen Ýshınskıı atyndaǵy orta mekteptiń 8-synyp oqýshysy D. Shafhatov óz quttyqtaýlaryn jetkizdi.
Memorıaldy keshen ekspozısıalary bir úlken zaldan jáne úsh taqyryptyq bólikten turady. "Saq dáýirinen Alash Orda úkimetiniń qurylýyna deıin", "Táýelsizdikke jetýge eleýli úles qosqan ataqty handar men bıler" jáne "Erligimen týǵan jerdiń dańqyn asqaqtatqan batyrlar" dep atalatyn keshen jas urpaqqa altynnan da qymbat qazyna bolmaq.
Ekspozısıada keskilesken urystar men el taǵdyry qyl ústinde turǵan alma-ǵaıyp zamanda óziniń erligimen talaı jaýdyń betin qaıtaryp, ulan ǵaıyr atyrapty urpaǵyna saqtap qalǵan ataqty handar men bıler, batyrlar men el táýelsizdigine úles qosqan jandardyń portretteri beınelengen. Ekspozısıanyń ortalyq tusynda batyr babalarǵa taǵzym kórsetýdi áspetteıtin kompozısıa beınelengen.
Babalar rýhyna taǵzym etý, jas urpaqqa ata-baba erligin pash etý maqsatynda boı kótergen keshenniń qurylysyn "Dáýlet Serpin 603" JSHS merdiger qurylys mekemesi júrgizdi. Nysannyń ornalasqan jalpy jer aýmaǵy - 1,04 gektardy quraıdy. Keshenniń aınalasyna dekoratıvti shyrshalar men kóshetter otyrǵyzylyp, tolyqtaı abattandyrylǵan. Mýzeı ǵımaraty oblys mesenattarynyń qarjysyna, al ishki ekspozısıalarynyń qurylysy Almaty oblysy ákimdiginiń tapsyrysy boıynsha salyndy. Memorıaldy keshendi kútip-ustaýǵa oblystyq mádenıet, arhıvter jáne qujattama basqarmasy jaýapty.
