Jetisý jerinde alǵash ret "QazTalks - ashyq áńgime alańy" sharasy ótti. İs-sharaǵa tanymal saıasattanýshy Saıasat Nurbek, «Sakraldy Qazaqstan» ǵylymı-zertteý ortalyǵynyń basshysy Berik Ábdiǵalı, fılologıa ǵylymdarynyń doktory, profesor Erden Qajybek, "Aıtýǵa ońaı" tok-shoýynyń júrgizýshisi Beısen Quranbek jáne belgili jýrnalıs Esbolat Aıdabosyn qatysty.
Aıta keteıik, shara uıymdastyrýshylary - Almaty oblysynyń ishki saıasat basqarmasy jáne Ortalyq komýnıkasıalar qyzmeti. Jobasynyń maqsaty Elbasy N. Á. Nazarbaevtyń "Bolashaqqa baǵdar: rýhanı jańǵyrý" atty maqalasynda kórsetilgen mindetterdiń iske asyrylýy boıynsha, tájirıbesi mol tulǵalardy toptastyryp, solardyń salıqaly oılary, salmaqty pikirleri men úzdik ıdeıalaryn barshaǵa jetkizý.
"QazTalks" alańynda qoǵamdyq qundylyqtar týraly Saıasat Nurbek sóz qozǵady. Onyń aıtýynsha búgingi tańda ekonomıka salasy boıynsha jıi ózgeriske ushyrap otyrǵan eki faktor bar. Biri - jalpy qundylyqtar. Ekinshisi - ınstıtýttar.
"Qundylyqtar salasy boıynsha kóptegen zertteýler júrgizilgen. Sonyń biri bizdiń elimizge saı jasalǵan amerıkandyq ǵalym Ronald Inglhardyń jumysy. Ol 1981 jyldan bastap "World Values Survey" dep atalatyn túrli halyqaralyq zertteýler júrgizgen. Otyz jyl kóleminde, 105 elde tájirıbesin ótkizgen. Atalǵan ádis boıynsha 2014 jyldan bastap áleýmettik zertteýler 18 jastan asqan 1600 adamdy qamtıtyn aýyl jáne qala turǵyndarynan quralǵan zertteý jumystary bastaldy. Qorytyndylaı kele, qazaqstandyqtar úshin densaýlyq 75,3 paıyz, balalar 54,2 paıyz, qaýipsizdik 44,7 paıyz, materıaldyq jaǵdaı 40,9 paıyz jáne mahabbat máselesi 35,6 paıyz quraıdy eken. Eskere ketetin taǵy bir jaıt dástúrimizdi, tilimiz ben dinimizdi saqtaı otyra, keleshekte ekonomıkalyq damyǵan elge aınalý", - dedi Saıasat Nurbek.
