Taldyqorǵan qalasynda "National Geographic" usynǵan úzdik 50 sýret" taqyrybynda uıymdastyrylǵan fotokórme óz jumysyna kiristi. Kórme kórsetilimderin óńirler ishinen birinshi bolyp Jetisý jerinen bastady. Bul týraly Almaty oblysynyń óńirlik komýnıkasıalar qyzmetiniń kóshpeli baspasóz-konferensıasynda aıtyldy.
Sharaǵa Oblystyq İshki saıasat pen Týrızm basqarma basshylary, "National Geographic Qazaqstan" jýrnalynyń ókilderi men osy kezdesýge arnaıy Qytaıdan shaqyrtylǵan belgili fotograf Ekpin Hasenjan qatysty.
Oqýshylar saraıynda bir aıǵa jalǵasatyn fotokórmede 128 jyldyq tarıhy bar sýretterdiń ishinen eń úzdik 50 sýret iriktep alyndy. Onda Stıv Makkarrıdyń dúnıeni sharlaǵan áıgili "Aýǵan qyzy" sýretinen bastap, Djeın Gýdolldyń tańǵajaıyp kadrlary, Tomas Aberkrombıdiń 1965 jyly túsirilgen Mekke kórinisi jáne "National Geographic" tarıhyndaǵy basqa da tanymal fototýyndylar pash etildi.
"Kórmedegi maqtanyshpen aıta alatyn sýretter óte kóp. Sonyń biri Emorı Krıstof tiriltken Tıtanıkti 10 000 vattyq jaryqpen 4022 metr tereńdikte túsirilgen sýreti. Bul sýret barlyq uly isterge bastaý bola bildi. Sebebi, osy bir tamasha týyndydan keıin Tıtanık tarıhy qaıta zerttelip, áıgili "Tıtanık" fılmi túsirildi", - dedi "National Geographic" jýrnalynyń jaýapty redaktory Ádilhanov Maqsat.
Shara sońynda "National Geographic Qazaqstan" jýrnalynyń qyzmetkerleri Almaty oblysynyń eń kórikti jerlerine ekspedısıaǵa attanady. Olar Áýlıe aǵash, Sharyn kanondary, Kólsaı kólderi, Qaıyńdy kóli, Toraıǵyr taýy, Esik qorǵany, Tańbaly memorıaldyq kesheni sekildi tarıhı-mádenı oryndar.
