Qazaqstan Prezıdenti Polsha Respýblıkasynyń Prezıdenti Andjeı Dýdamen keńeıtilgen quramda kezdesý ótkizdi. Bul týraly Qamshy.kz aqparat agenttigi Aqordanyń baspasóz qyzmetine silteme jasap habarlaıdy.
Kezdesý barysynda Memleket basshysy byltyr Varshavaǵa jasaǵan saparynyń nátıjelerin atap ótti. Onda Qazaqstan-Polsha bıznes-forýmy aıasynda quny 1 mıllıard dollarǵa jýyq 15 komersıalyq qujatqa qol qoıylyp, Qazaqstan men Polsha arasynda tikeleı áýe qatynasyn ornatý jóninde ýaǵdalastyqqa qol jetkizildi.
Nursultan Nazarbaev ótken jyldyń ózinde Qazaqstanda polák kapıtalynyń qatysýymen 10 kásiporyn iske qosylyp, 100 mıllıon dollarǵa jýyq ınvestısıa salynǵanyn aıtty.
– Bıyl Polsha ekonomıkasy Qazaqstan ekonomıkasy sıaqty 4%-ǵa deıin ósýi múmkin. Bul ósim bizge bolashaqqa zor úmitpen qaraýǵa múmkindik beredi. Qazaqstan men Polshanyń transformasıalaný joldary uqsas. Nátıjesinde, halyqtarymyzdyń ál-aýqaty artyp otyr, – dedi Qazaqstan Prezıdenti.
Nursultan Nazarbaev Qazaqstanda bıznesmender men ınvestorlar úshin jasalyp jatqan jaǵdaılarǵa nazar aýdaryp, saýda-ekonomıkalyq saladaǵy kooperasıany odan ári keńeıtýdiń mańyzdylyǵyn erekshe atap ótti.
– Halyqaralyq uıymdar Qazaqstandaǵy ınvestısıalyq klımat eń qolaıly dep sanaıdy. Qazir bizde sheteldik ınvestorlarmen jumys isteıtin «Qazaq Invest» kompanıasy quryldy. Sondaı-aq, «EKSPO» kórmesi aıaqtalǵan soń «Astana» halyqaralyq qarjy ortalyǵy jumysyn bastaıdy. Onda aǵylshyn quqyǵy qoldanylatyn bolady. Álemdik qarjy ınstıtýttarynyń barlyǵy derlik «Astana» halyqaralyq qarjy ortalyǵymen jumys isteýge kelisim berip otyr, – dedi Qazaqstan Prezıdenti.
Memleket basshysy Qazaqstan Polsha úshin óńirdegi basty saýda seriktesi ári Ortalyq Azıa men Eýrazıalyq ekonomıkalyq odaq elderi naryǵyna shyǵatyn senimdi plasdarm bolyp sanalatynyn aıtty.
Andjeı Dýda Nursultan Nazarbaevtyń byltyrǵy Polshaǵa jasaǵan sapary eki memleket arasyndaǵy saýda-ekonomıkalyq qarym-qatynasty jaqsartýǵa serpin bergenin atap ótti.
– Biz birlese kúsh jumyldyrýymyzdyń arqasynda taýar aınalymynyń joǵary deńgeıine qol jetkize alatynymyzǵa senimdimin. Sondaı-aq, «EKSPO-2017» kórmesine qatysyp, Polsha men Qazaqstan pavılondaryn kórýge múmkindik jasalǵany úshin rızashylyq bildiremin. Bul kórme jańartylatyn energıa kózderine jáne shıkizattyń dástúrli kózderin qorshaǵan orta úshin qaýipsiz qoldanýǵa baılanysty zamanaýı tehnologıalardy kórsetýge mol múmkindik beredi, – dedi Polsha Prezıdenti.
Kezdesý sońynda memleketter basshylary buqaralyq aqparat quraldarynyń ókilderi úshin birlesken brıfıń ótkizdi. Qazaqstan Prezıdenti jýrnalıser aldynda sóılegen sózinde Qazaqstan men Polsha arasyndaǵy ózara qarym-qatynas 25 jyl ishinde dıplomatıalyq baılanystar ornaǵan sátten beri damyp kele jatqanyn atap ótti.
– Bizdiń elde Polsha kapıtalynyń qatysýymen 115 kásiporyn jumys isteýde, 200 mıllıon dollardan astam tikeleı ınvestısıa salyndy. Mashına jasaý, aýyl sharýashylyǵy, energetıka, hımıa, kólik, qurylys salalarynyń perspektıvasy zor, – dedi Qazaqstan Prezıdenti.
Nursultan Nazarbaev Azıa men Eýropa arasynda júkti jedel jetkizý úshin zamanaýı kólik ınfraqurylymyn qalyptastyrýǵa baǵyttalǵan jobalardy birlese iske asyrýǵa daıyn ekenimizdi bildirdi.
Memleket basshysy sondaı-aq ǵylym men bilim berý jáne mádenı-gýmanıtarlyq salalarynda eki el arasyndaǵy baılanystardy damytý máselelerine toqtaldy.
Budan bólek, Qazaqstan Prezıdenti Polsha Prezıdentine Qazaqstan Respýblıkasynyń Eýropalyq odaqpen keńeıtilgen seriktestigi jáne yntymaqtastyǵy jónindegi kelisimdi ratıfıkasıalaǵany úshin alǵys aıtyp, Polshanyń 2018-2019 jyldardaǵy BUU Qaýipsizdik Keńesiniń músheligi kezeńinde halyqaralyq kún tártibindegi ózekti máselelerdi sheshý úshin birlese jumys atqarýdyń mańyzdylyǵyn atap ótti.
Polsha Prezıdenti eki eldiń birlesken is-qımyly ekonomıkalyq qarym-qatynastardy ilgeriletip, ony jańa deńgeıge kóterýge múmkindik beretinine senimdi ekenin aıtty.
– Biz Qazaqstan-Polsha qarym-qatynastaryn jaqsartýǵa baǵyttalǵan jolmen júrip kelemiz. Men Qazaqstan Prezıdentine Polshanyń kandıdatýrasyn BUU Qaýipsizdik Keńesiniń turaqty emes músheligine saılanýǵa qoldaý bildirgeni úshin alǵys aıtamyn. Biz osy uıymdaǵy jumysymyzda Qazaqstannyń tájirıbesin paıdalanatyn bolamyz. BUU Qaýipsizdik Keńesindegi Qazaqstannyń róli asa mańyzdy. Ásirese, elderińizdiń Sırıadaǵy qaqtyǵysty beıbit retteý jónindegi tıimdi mısıasyn erekshe atap ótkim keledi, – dedi A.Dýda.
Aıta ketsek, Polsha Prezıdentiniń Qazaqstanǵa memlekettik sapary aıasynda tómendegideı qujattarǵa qol qoıyldy:
– «Jasyl kópir» áriptestik baǵdarlamasy týraly hartıa;
– Qazaqstan Respýblıkasy Ulttyq ekonomıka mınıstrligi men Polsha Respýblıkasy Damý jáne qarjy mınıstrligi arasyndaǵy ekonomıkalyq yntymaqtastyq týraly kelisim.
