4 qyrkúıek kúni ótken BUU Qaýipsizdik keńesiniń shuǵyl otyrysynda Qazaqstan Koreı Halyqtyq Demokratıalyq Respýblıkasynyń ıadrolyq synaqtaryna qarsy pikir bildirdi, dep habarlaıdy Qamshy.kz aqparat agenttigi QR SİM-iniń bapasóz qyzmetine silteme jasap.

«Halyqaralyq qoǵamdastyq HHİ ǵasyrda altynshy márte jasalǵan ıadrolyq synaqtyń kýási bolýynyń ózi - adam sengisiz jaǵdaı. Mundaı áreketter halyqaralyq qoǵamdastyqtyń ıadrolyq qarýdan azat álem qurý úshin jumsaǵan ujymdyq kúshin aıtarlyqtaı tómendetedi», - dedi BUU janyndaǵy Qazaqstannyń turaqty ókili Qaırat Omarov BUU QK-iniń otyrysynda.

Qazaqstan delegasıasy soltústikkoreılik bılikti ıadrolyq synaqtan bas tartyp, kelissózder ústeline oralýǵa shaqyrdy. «Iadrolyq qarý ulttyq qaýipsizdiktiń naǵyz kepili bola almaıdy», delingen málimdemede.

Qazaqstan máseleni batyl saıası-dıplomatıalyq qadamdar arqyly jan-jaqty ári ujymdyq túrde sheshý joldaryn izdestirýdi qoldaıdy.

Qazaqstan tarapynyń pikirinshe, áskerı tásil eshqashan máseleniń turaqty ári uzaq merzimdi sheshimine ákelip kórmegen. Turaqty ókil sondaı-aq, BUU-ǵa múshe basqa elder qatarynda KHDR-dyń da Bas assambleıanyń Halyqaralyq ıadrolyq synaqtarǵa qarsy is-qımyl kúnin qoldaý jónindegi qararyna daýys bergendigin eske sala ketti.