EO bıligi Soltústik Koreıaǵa qarsy jeke shekteý sharalaryn daıyndaý ústinde, dep jazady Qamshy.kz aqparat agenttigi. Bul týraly EO Syrtqy ister jáne qaýipsizdik saıasaty jónindegi joǵary ókili Federıka Mogerını málim etti.

«Búgin men EO-nyń jeke sanksıalyryn kúsheıtý aıasynda mınıstrlerdiń jumys isteýin suraımyn», - dep keltirdi AFP agenttigi Mogerınıdiń sózin.

3 qyrkúıekte Phenán jańa sýtegi bombasyn synaqtan sátti ótkizgenin habarlaǵan. Bomba kontınentaralyq balıstıkalyq zymyranǵa arnalǵan oqtyq retinde paıdalanylýy múmkin. KHDR-dyń kezekti synaǵy halyqaralyq qaýymdastyqtyń alańdaýshylyǵyn týdyrdy. Sol kúni-aq Ulybrıtanıa, AQSH, Fransıa, Ońtústik Koreıa jáne Japonıa elderi BUU Qaýipsizdik Keńesiniń shuǵyl otyrysyn ótkizýdi surady.

AQSH KHDR-ǵa qarsy sanksıalyq rejımdi kúsheıtýdi, BUU-nyń tıisti sheshim qabyldaýyn talap etti.

Reseı óz kezeginde sanksıalar rejımin qataıtý Soltústik Koreıa basshylyǵynyń aǵymdyq baǵytyna esh áserin tıgizbeıtinin málimdegen.