Búgin 7 qyrkúıekte Almaty qalasy Medeý aýdandyq 2-sotynda «Trıbýna. Saıası qalam» gazetiniń bas redaktorynyń mindetin atqarýshy Janbolat Mamaıdyń isine qatysty sot úkim shyǵardy, dep habarlaıdy Qamshy.kz aqparat agenttigi. Sýdıa úkiminde Qylmystyq kodekstiń 193-babynyń 3-tarmaǵy boıynsha Janbolat Mamaıdy 3 jylǵa bas bostandyǵynan shektelip, 3 jyl jýrnalısik qyzmetpen aınalysý quqyǵynan aıyrylǵanyn aıtqan. Al Sot Mamaıdyń aqpan aıynan beri 7 aı qamaýda otyrǵanyn eskerip, ony 2 jyl 5 aı, 5 kúnge bas bostandyǵynan shektedi jáne 3 jyl jýrnalısik qyzmetpen aınalysý quqyǵynan aıyryldy, ári dúnıe-múlki tárkilenedi.
Azattyqtyń habarlaýynsha, 6 qyrkúıek kúni jalǵasqan sot otyrysy Janbolat Mamaıdyń sońǵy sózimen bastalyp, sonymen aıaqtalǵan.
Jýrnalıs sońǵy sózinde ózine taǵylǵan aıypty moıyndamaıtynyn aıtty. Onyń sózinshe, «Trıbýna. Saıası qalam» gazeti eshkimniń tapsyrysyn oryndaýmen shuǵyldanbaǵan, táýelsiz bolǵan».
– Gazette ne jazý kerektigi týraly eshkim nusqaý bere alǵan joq. Redaksıa saıasatyn osy gazettiń qyzmetkerleri men avtorlary ǵana anyqtady. 2012 jyldan bastap qolǵa alǵan jobany uıymdastyrýǵa Tólegen Júkeev kómektesti. Jaqsylyq Jarymbetov aqshalaı kómekteskeni de ras. Biraq odan alǵan kómegim zańǵa qaıshy emes bolatyn. Jarymbetov azamattyq qoǵamdy damytý úshin kómekteskisi keldi. Men qazirdiń ózinde Jaqsylyq Jarymbetovke renjimeımin, – dedi Janbolat Mamaı.
Mamaıdyń sońǵy sózin aıtyp bolǵan soń sýdıa úkim qyrkúıektiń 7-si kúni jarıalanatynyn habarlap, sot otyrysyn aıaqtaǵan.
Aıta keteıik, "Trıbýna. Saıası qalam" gazetiniń bas redaktory Janbolat Mamaı 10 aqpanda opozısıalyq saıasatker Muhtar Áblázov urlaǵan aqshany zańdastyrdy degen aıyppen tutqyndalǵan bolatyn. 2009 jyldan beri Eýropada júrgen, bıyl maýsym aıynda Almaty soty tarapynan «bankten aqsha jymqyrdy, qylmystyq top qurdy jáne ony basqardy» degen aıyptarmen syrttaı 20 jylǵa sottalǵan Muhtar Áblázov ta bul aıyptaýdy «absýrd» dep atap, Mamaımen eshqashan kezdespegenin málimdegen.
Aqpan aıynan beri ár kúni úmit pen kúdikke toly ótken Janbolat Mamaıǵa qatysty júrgizilgen sot isine qatysty aqparatty Qamshy.kz aqparat agenttigi jarıalaǵan.
