5 qyrkúıek kúni Astanada memlekettik joǵary oqý oryndary rektorlary laýazymdaryna úmitkerlerdi aıqyndaý boıynsha Respýblıkalyq konkýrstyq komısıa otyrysy bolyp ótti. Bul týraly Qamshy.kz aqparat agenttigi QazAqparat málimetine súıenip habarlaıdy.
Otyrys barysynda 5 memlekettik JOO: Atyraý munaı jáne gaz ýnıversıtetiniń, Qazaq memlekettik qyzdar pedagogıkalyq ýnıversıtetiniń, Sh. Esenov atyndaǵy Kaspıı memlekettik tehnologıalar jáne ınjınırıń ýnıversıtetiniń, M.H. Dýlatı atyndaǵy Taraz memlekettik ýnıversıtetiniń, S. Toraıǵyrov atyndaǵy Pavlodar memlekettik ýnıversıtetiniń rektorlyqtaryna úmitkerler qarastyryldy.
Qazaqstan Respýblıkasy Premer-mınıstriniń orynbasary Erbolat Dosaevtyń tóraǵalyǵymen, sondaı-aq, QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaevanyń, QR «Atameken» Ulttyq kásipkerler palatasynyń basqarma tóraǵasy Abylaı Myrzahmetovtiń, «Qazaqstan» RTRK» AQ Basqarmasynyń tóraǵasy Erlan Qarınniń, QR Bilim jáne ǵylym vıse-mınıstri Asqat Aımaǵambetovtiń, Qazaqstannyń Joǵary oqý oryndary qaýymdastyǵynyń prezıdenti Rahman Alshanovtyń jáne basqa da komısıa músheleriniń qatysýymen ótken otyrysta vakantty rektorlyq laýazymdarǵa úmitkerlermen suhbattar ótkizildi.
15 úmitker JOO damytý baǵdarlamalaryn usyndy. Olar JOO Baqylaý keńesteriniń usynymdary boıynsha, 38 úmitkerdiń arasynan iriktelinip alyndy.
Suhbattasýlar qorytyndylary men JOO damytý baǵdarlamalaryn talqylaý nátıjesinde konkýrstyq komısıa tómendegi úmitkerlerdi rektorlyq laýazymǵa usyndy: Atyraý munaı jáne gaz ýnıversıtetine - Ábishev Álı Ájimuly, Qazaq memlekettik qyzdar pedagogıkalyq ýnıversıtetine - Aldambergenova Gaýhar Tóremuratqyzy, Sh. Esenov atyndaǵy Kaspıı memlekettik tehnologıalar jáne ınjınırıń ýnıversıtetine - Ahmetov Berik Baqytjanuly, M.H. Dýlatı atyndaǵy Taraz memlekettik ýnıversıtetine - Sarybekov Mahmetǵalı Nurǵalıuly, S. Toraıǵyrov atyndaǵy Pavlodar memlekettik ýnıversıtetine - Ahmetova Gaýhar Ǵalymqyzy.
Rektorlardy saılaýdy engizý Elbasy N.Á. Nazarbaev belgilegen bes ınstıtýsıonaldyq reformalardy iske asyrý jónindegi 100 naqty qadam - Ult josparynyń 78 qadamyna sáıkes, JOO-darynyń akademıalyq jáne basqarý derbestikterin kezeń-kezeńimen keńeıtýge baǵyttalyp otyr.
