8 qyrkúıek kúni Astanadaǵy «Barys Arena» sport kesheninde qazaq kúresinen «Álem Barysy» túıe balýandar arasyndaǵy álem chempıonaty ótedi. EKSPO halyqaralyq mamandandyrylǵan kórmesi aıasynda uıymdastyrylyp otyrǵan bedeldi básekege 40 eldiń balýany qatysady. Sheteldik sportshylarǵa Qazaqstannyń tórt balýany tótep beredi. Bul týraly Qamshy.kz aqparat agenttigi Astana qalasy ákimdiginiń baspasóz qyzmetine silteme jasap habarlaıdy.
22 tamyzdan bastap qazaq kúresinen Qazaqstan Ulttyq quramasy Astanada oqý-jattyǵý jıynyn ótkizýde. Jıyn nátıjesi boıynsha bas jattyqtyrýshy Erlan Estek bastaǵan baspkerlik keńes «Álem Barysynda» el namysyn qorǵaıtyn balýandardy iriktedi. Olar: tórt dúrkin álem chempıony jáne Qazaqstan Barysy jeńimpazy Aıbek Nuǵymarov, álem chempıony jáne Qazaqstan Barysy týrnıriniń jeńimpazy Muhıt Tursynov, jas ta bolsa, bolashaǵynan zor úmit kúttiretin Aıbat Seıten jáne Dáýren Nuralınov.
Sonymen qatar, bıylǵy Qazaqstan Barysy jeńimpazy Elaman Erǵalıev, tanymal túıe balýan Erjan Shynkeevtiń qatysýy da múmkin.
Álemniń túkpir-túkpirinen qatysýshylar Astanaǵa kele bastady. Búginde Avstralıa, Jańa Zelandıa, Qytaı jáne Gana balýandary Elordaǵa jetti. Jarys sharty boıynsha, barlyq qatysýshylarǵa qazaq kúresinen arnalǵan sporttyq kúrteshe men aıaq kıim berilýde. Búgin sheteldik tóreshilerge qazaq kúresiniń erejeleri boıynsha semınar ótkiziledi.
Birinshiliktiń jalpy júlde qory 30 mıllıon teńge. Onyń ishinde 15 mıllıony jeńimpazǵa tıesili. Dástúr boıynsha, altyn, kúmis jáne qola belbeýler de qarastyrylǵan. Jankúıerler de júldesiz qalmaıdy. Kórermender arasynda Renault Logan avtokóligi oınatylady.
Aıta ketý kerek, absolútti álem chempıonatyn tikeleı efırde «Qazaqstan», «Qazsport», túriktiń «TRT Avaz», Reseıdiń «Mach! Planeta» jáne «Boks TV» telearnalary kórsetedi.
Esterińizge salamyz, Alem Barysy 2014 jyly Pavlodar qalasynda ótti. Tartysty báseke nátıjesinde altyn belbeý men júz myń AQSH dollardy kýbalyq Braıson ıelendi. Ekinshi orynda Aıbek Nuǵymarov, úshinshi satyda reseılik Maksım Shıráev.
