Sheneýnikterdiń qazaq tilinde sóılemeýi májilis depýtaty Baqytjan Ábdiraıymnyń  namysyna tıdi, dep habarlaıdy Qamshy.kz aqparat agenttigi Sputnik Qazaqstan saıtyna silteme jasaı otyryp. 

"Búgingi bizdiń talqylap jatqan suraq óte mańyzdy jáne ózekti. Biraq budan da zor bir máselege biz búgin jaýap tappadyq, qurmetti áriptester. Jáne ol meniń kóńilime, namysyma qatty tıdi. 12 qazaq tilinde, ıaǵnı memlekettik tilde berilgen suraqtyń 11-ine orys tilinde jaýap berdi. Kim jaýap berdi? Ákimniń orynbasary, áleýmettik qorǵaý mınıstriniń orynbasary, olar kimmen jumys isteıdi? Halyqpen jumys isteıdi. Olar qazaq tilinde jaýap bere almasa, qalaı jumys isteıdi?", — dep keıidi depýtat. 

Halyq qalaýlysy Elbasynyń rýhanı jańǵyrý jónindegi óz maqalasynda "memlekettik tildi qurmetteý — táýelsizdikti qurmetteý" dep aıtqanyn eske saldy. 

"Mine, búgin jıynnyń basynan sońyna deıin tóraǵamyz Vladımır Karpovıch (Vladımır Bojko – májilis tóraǵasynyń orynbasary) qazaq tilinde júrgizip jatyr. Magerramov myrza baıandamasyn taza qazaq tilinde oqydy, Snejanna Imasheva degen bizdiń qaryndasymyz qazaq tilinde sóıleıdi. Shıpovskıh bolsa bizden jaqsy qazaqsha sóıleıdi", — dedi Ábdiraıym. 

"Bizdiń reglamentte qazaq tilinde, ıaǵnı memlekettik tilde suraq qoıylsa, sol tilde jaýap berilýi kerek dep tikeleı kórsetilgen. Biz buǵan qazir shekteý qoımasaq, osylaı jalǵasa beredi. Sol sebepten, tóraǵa myrza, meniń ótinishim, bolashaqta bizge keletin laýazymdy qyzmetkerler memlekettik tilde suraq qoıylsa, sol tilde jaýap berýge tyryssyn", — degen ótinishin bildirdi depýtat.

Aıta ketsek, osy jıynda daıyndalmaı kelip, qaǵazdan bas kótermegen sheneýnikter depýtat Zaǵıpa Balıevadan da sóz estigen bolatyn.