Qazaqstan Prezıdenti Nursultan Nazarbaev Germanıanyń Federaldyq kansleri Angela Merkelge quttyqtaý jedelhatyn joldady, ― dep habarlaıdy Qamshy.kz aqparat agenttigi Aqordaǵa silteme jasap.

Nursultan Nazarbaev Angela Merkeldi Hrıstıan demokratıalyq odaǵynyń Germanıa Býndestagyna saılaýda jeńiske jetýimen quttyqtady. Memleket basshysy saılaý qorytyndylary Federaldyq kanslerdiń áleýmettik-ekonomıkalyq saıasatyna nemis halqynyń qoldaý kórsetip otyrǵanynyń jarqyn mysaly ekenin atap ótti.    

Qazaqstan Prezıdenti Angela Merkeldiń halyqaralyq bedeline toqtalyp, onyń óńirlik jáne jahandyq qaýipsizdikti qamtamasyz etýge qosqan úlesin joǵary baǵalady.

«25 jyl ishinde Qazaqstan men Germanıa arasyndaǵy dostyq qarym-qatynastar joǵary deńgeıge kóterildi. Elderimizdi jaqyndastyrýǵa septigin tıgizgen birlesken jobalardy tabysty iske asyrýǵa Sizdiń zor úles qosqanyńyzdy atap ótkim keledi», ― delingen jedelhatta.

Sońynda Nursultan Nazarbaev Angela Merkelge zor densaýlyq pen tabys, al dostas Germanıa halqyna baq-bereke tiledi.