Qaraǵandy oblysynda nemeresin baýyzdap óltirgen naǵashy atasy ustaldy, — dep habarlaıdy Qamshy.kz aqparat agenttigi ktk.kz saıtyna silteme jasaı otyryp.
Araqqa sylqıa toıyp alǵan Shet aýdanynyń turǵyny 3 jastaǵy jıeniniń tamaǵyn osyp jeberip, munymen de toqtamaı birneshe jerden pyshaq salǵan. Bala sodan jan tapsyrǵan soń, aıýandyq jasaǵan atasy qannen-qapersiz uıqyǵa ketipti. Erteńine ǵana ne búldirgenin kórip, úıinen qashqan. Araǵa bir apta salyp qolǵan túsken ol qylmysyn moıyndady. Al qara jamyldy degen úıdegiler otbasynyń asyraýshysy dep, otaǵasyn jaqtap otyr.
Arsendi baýyzdaıtyń túni 39 jastaǵy Vıtalıı áıeli ekeýi 2 bótelke araqty qyldaı bólip ishken. Masaıǵan Elena táltirektep kórshisiniń úıine ketse, sońǵy shıshany jalǵyz ózi simirgen Vıtalıı kishkentaı Arsendi jaıratyp salady. Keıin munysyn esi ketken maskúnem, shoshqa soıyp jatyr ekem dep oıladym dep miz baqpaı aıtyp beripti. Al qyrshyn sábıdiń naǵashy ájesi nemeresin emes, qamalǵan erin joqtap álek.
Elena Rezentúk, Arsenniń ájesi:
— Qylmysyn moıyndaıtynyn aıtty. Sol kúni shoshqa soıǵan edi. Sonyń da áseri bolǵan shyǵar. Onyń aldynda tistiń dárisin kóptep ishken bolatyn. Araqpen aralasyp esin ketirgen sol bolýy kerek.
Arsendi bul otbasynyń myna úlken qyzy 15 jasynda týǵan eken. Týa sala, uldy áke-sheshesine tastap ózi qalaǵa nápaqa tabýǵa ketken. Bunyń da balam óldi dep baýyry ezilip otyrmaǵany anyq baıqalady. Kózinen bir tamshy jas tambaǵan ol da, ákesin jaqtap shyqty.
Nadejda Rezentúk, Arsenniń anasy:
— Balanyń beti , qulaǵy tilgilengen. Tamaǵyn osyp jibergen, uıyqtap jatqan kúıi ólip ketken ǵoı. Jany qınalmaǵan shyǵar dep oılaımyn. Úıdegiler balanyń ólgenin tańerteń ǵana baıqaǵan. Árıne, janym ashıdy. Biraq ólgen bala qaıtyp kelmeıdi. Ákem bolmasa, 4 baýyrymdy kim asyraıdy?
Bul úıdegiler jaǵdaıy tómen otbasy retinde aýdannyń esebinde tur. Kórshileri de aýyzdarynan araqtyń ıisi ketpeıtin otbasyny anadaıdan aınalyp ótýge tyrysady eken. Aınaldyrǵan 20-aq úıi bar aýyldy myna jaǵdaı tipti shoshytyp otyr.
— Aıýandyq jasaǵan túnniń ertesinde kúdikti úıden bezgen. Týyp ósken óńiriniń ár tasy men saı-salasyn biletin ony polıseıler bir apta izdep taba almaǵan. Aqyry úıine kıim aýystyrýǵa kelgende qolǵa tústi.
Osy aralyqta ol aýyzǵa iligetin jıdek jep, ózen sýyn iship, dalada túnep kelipti. Kún kúrt sýytqan soń shydamasa kerek, tún ortasynda úıine kelip, jyly kıimderin alyp jatqanda torýyldap júrgen polısıanyń qolyna túsken. Birden kinásin moıyndaǵan ol tergeý abaqtysyna qamaldy.
