AQSH ýaqytsha Túrkıa aýmaǵynda vıza berýdi toqtatty. Bul jaıynda Qamshy.kz aqparat agenttigi Bloomberg málimetine súıenip habarlaıdy.

Atalǵan jaǵdaı eki el arasynda 4-shi qazanda oryn alǵan keleńsizdik saldarynan bastaý alǵan. Túrkıa bıligi Ystanbuldaǵy AQSH elshiliginiń qyzmetkerin Fethýllah Gúlenmen baılanysy bar degen kúdikpen  tutqyndaǵan. Kúdikti sot sheshimi boıynsha Túrkıa úkimeti men eldegi konstıtýsıalyq tártipti «joıýǵa» árekettengen jáne tyńshy degen aıyp boıynsha tutqynǵa alynǵan.

Vashıngton Ankaranyń bul áreketin eki jaqty qarym-qatynasqa syzat túsiretin negizsiz qadam dep aıyptady.

Túrkıadaǵy AQSH elshiliginiń anyqtamasynda sońǵy ýaqyttaǵy keleńsiz jaǵdaılar dıplomatıalyq mekemelerdegi qyzmetkerlerdiń qaýipsizdigine kóńil bólýge ıtermelegeni aıtylǵan.

Túrkıa prezıdenti Rejep Erdoǵan Ankaranyń prınsıpke súıenip AQSH sekildi vıza berýdi toqtatatynyn málimdedi. Bul jaıynda Túrkıa prezıdenti Ýkraına prezıdenti Petr Lýkashenkomen ótken kezdesýden keıin habarlady.

Erdoǵannyń málimdeýinshe, Túrkınányń Syrtqy İster mınıstrligi AQSH ókilderine júginip,  atalmysh máseleniń sheshimin tabýǵa tyrysqan.

«Ankara elshiligi atalmysh sheshimdi qabyldaǵany bizdi qynjyltady. Túrkıa – quqyqtyq memleket.  Biz taıpa nemese taıpalyq memleket emespiz. AQSH qandaı sheshim qabyldasa, mindetti túrde jáne dereý, Túrkıa da dál sondaı sheshim shyǵara alady» dep málimdedi Túrkıa prezıdenti.

Aıta ketsek, 9 qazanda Túrkıa bıligi AQSH elshiliginiń taǵy bir qyzmetkerin tutqyndaýǵa sheshim shyǵardy.