Astana jáne Almatyda kásibı standarttardy daıyndaýdyń jańa ádistemesin oqytýǵa arnalǵan is-sharalar uıymdastyryldy. Osynyń arqasynda 70-ten asa standart daıyndaýshy maman trenıńterden jáne sertıfıkasıadan ótti dep habarlaıdy Qamshy.kz aqparat agenttigi.
Ádistemeni Qazaqstan Respýblıkasy Eńbek jáne halyqty áleýmettik qorǵaý mınıstrligi júzege asyryp jatqan «Eńbek daǵdylaryn damytý jáne jumys oryndaryn yntalandyrý» jobasy aıasynda Ernst & Young kompanıasy daıyndady. 2020 jyldyń maýsymyna deıin 550 kásibı standartty daıyndap, bekitý josparlanyp otyr.
Ádistemeni talqylaýǵa Qazaqstan Respýblıkasy Eńbek jáne halyqty áleýmettik qorǵaý mınıstrliginiń, «Atameken» Ulttyq kásipkerler palatasynyń, bilim berý uıymdary men jumys berýshiler qaýymdastyqtarnyń ókilderi qatysyp, osynyń nátıjesinde kásibı standart qurylymyn jáne de ony daıyndaý men maquldaýdyń rásimin sıpattaıtyn keshendi tásildeme qalyptastyryldy. Standarttardy daıyndaý jumysyna tıisti kásipterdiń jumysshylary, jumys berýshiler, sondaı-aq, bilim berý mekemeleriniń, salalyq qaýymdastyqtardyń, zertteýshi uıymdar men memlekettik organdardyń ókilderi, táýelsiz sarapshylar men keńes berýshiler tartylatyn bolady. Al jumysty úılestirýmen oqytý men sertıfıkasıadan ótken standart daıyndaýshy mamandar aınalysady.
«Kásibı standarttar Ulttyq biliktilikter júıesiniń ajyramas bóligi bolyp tabylady. Bul standarttar memleketke jumysshylardy oqytý, sondaı-aq, bilim berý mekemelerinde, ártúrli kýrstarda, sondaı-aq, tikeleı eńbek qyzmeti kezinde úırengen resmı jáne beıresmı daǵdylardy moıyndaý syndy maqsattardy júzege asyrýǵa kómektespek. Kásibı standarttar men biliktilikter júıesin endirý nátıjesinde eńbek naryǵy suranysqa ıe kadrlarmen tolyǵatyn bolady», - dep atap ótti Qazaqstan Respýblıkasy Eńbek jáne halyqty áleýmettik qorǵaý mınıstrligi Eńbek jáne áleýmettik seriktestik departamentiniń dırektory Nurken Tileýov.
Sertıfıkasıadan ótken standart daıyndaýshy mamandar kásibı standarttardy daıyndaýǵa ústimizdegi jyly kiriskeli otyr. Osy rette bul standarttar udaıy ózgeristerden ótip otyrady: quziretti uıymdar eń kem degende úsh jylda bir ret olardy qaıta qarastyryp, jańartyp otyrady. Óndiristiń uıymdastyrylýy, onyń erekshelikteri men qurylymynyń ózgerýi, sondaı-aq, eńbek fýnksıalarynyń, quzyrettilikter men biliktilikter mazmunynyń ózgerýine ákeletin jańa tehnologıalardy endirý syndy jaǵdaılar daıyndalǵan standarttardy qaıta qarastyrýǵa jáne aýystyrýǵa sebep bolady.
