Ulynyń týý týraly kýáligin jasatýǵa barǵan Shymkent qalasynyń 25 jastaǵy turǵyny qujattarǵa sáıkes óziniń 16 jyl buryn  ólip qalǵanyn anyqtady.

16 jyl óldige sanalǵan Baǵdat Jumadilovqa qorqynyshty jańalyqty HQKO-nyń qyzmetkerleri jetkizgen. Qujattarǵa sáıkes, ol 16 jyl buryn qaıtys bolǵan, dep Qamshy.kz aqparat agenttigi informburo.kz saıtyna silteme jasap habarlaıdy.

Óli dep eseptelgen 25 jastaǵy azamat qalypty ómir súrdi: dıplom aldy, áskerge baryp, boryshyn ótedi, úılendi. Tańqalarlyǵy sol, óziniń 16 jyl qaıtys bolǵandardyń tiziminde bolǵanyn ulyna týý týraly kýálik jasatý kezinde ǵana bilgen.

«Men tirimin, biraq qujat boıynsha ólgen adam ekenmin. Osyǵan deıin HQKO-nyń qyzmetkerleri bul AHAJ bóliminiń kinási degen. Endi qazir jumyspen qamtý jáne áleýmettik baǵdarlamalar ortalyǵyn aıyptap otyr. Aıtýlarynsha: «Qujattaǵy qatelikti Qyzylorda oblysy, Shıeli aýdany jibergen. Biraq, men de meniń otbasym da ol jaqta eshqashan bolyp kórmegen. Men sonda Shıelide qalaı ólýim múmkin?..» - dep Baǵdat Jumadilov tosyn jańalyqqa tańǵaldy.

Mundaı sumdyq qatelikti kim jasaıdy? HQKO men AHAJ bólimi kimniń kináli ekenin aıta almaı otyr. Tiri azamattyń ózi de kinálilerdi izdeýge nıetti emes.  AHAJ bólimi eki apta ishinde Baǵdat Jumadilovti tirilerdiń qataryna qosýǵa ýáde etti.

«Biz onyń ótinishin joǵary organǵa – Qazaqstan Respýblıkasy Ádilet mınıstrligine jiberemiz. Solaı ǵana másele sheshiletin bolady. Al bul kisini qaza bolǵandardyń qataryna kim qosqany týraly derekter joq», - deıdi Shymkent qalasyndaǵy AHAJ bóliminiń ókili Klara Tileýova.