Qazaqstan Respýblıkasynyń azamatshasy qazaq-qyrǵyz shekarasynda qaıtys boldy, dep Qamshy.kz aqparat agenttigi today.kz saıtyna silteme jasap habarlaıdy.  

70 jastaǵy qazaqstandyq áıel qazaq-qyrǵyz shekarasyndaǵy «Aq Tilek» baqylaý-ótkizý pýnktinde qaza tapty. Derekter boıynsha, onyń gıpertonıalyq krızi bolǵan.

«1947 jyly dúnıege kelgen Qazaqstan azamatshasy Albına Shaǵımova  Qyrǵyzstan-Qazaqstan shekarasyndaǵy baqylaý beketinde qaıtys boldy. Ol Qazaqstannan Qyrǵyzstan shekarasyn kesip ótken soń ózin jaısyz sezingen. Shekara qyzmeti medısınalyq alǵashqy kómek kórsetti. Sodan keıin jedel járdem shaqyryldy»,- dep málimdedi quzyretti organ ókilderi.

Qaıǵyly oqıǵa 13 qazanda túski ýaqytta Qazaqstan shekarasynan ótip ketken soń oryn aldy.

«Jolda kezikken jedel járdem brıgadasy áıeldiń qaıtys bolǵanyn aıtady. Aldyn-ala málimet boıynsha, onyń gıpertonıalyq krızi boldy. Uly anasynyń denesin Qazaqstanǵa alyp ketti», - delingen baspasóz qyzmetiniń málimdemesinde.

Quzyretti organnyń aıtýynsha, qaıǵyly oqıǵa kezinde shekarada eshqandaı tejeý bolmaǵan. Qazaqstannan Qyrǵyzstanǵa ótý baǵytynda keptelis joq, adamdar qalypty qozǵalyp jatqany habarlamada baıandalǵan.

Esterińizge sala keteıik, 11 qazanda áleýmettik jelidegi paıdalanýshylar Qazaqstan men Qyrǵyzstan shekarasynda týyndaǵan uzaq kezekke shaǵymdanǵan bolatyn. Bul keptelis Qordaı baqylaý-ótkizý pýnktinde oryn aldy. Osyǵan baılanysty Qyrǵyzstan Respýblıkasynyń Premer-Mınıstri Sapar Isakov shekaradan ótýshilerge yńǵaıly jaǵdaı jasaýdy tapsyrdy.