Búgin QR Ulttyq ǵylym akademıasynda «Alash murasy jáne Qazaqstan qoǵamyndaǵy rýhanı jańǵyrý: sabaqtastyq máseleleri» atty konferensıa ótti dep habarlaıdy Qamshy.kz aqparat agenttigi.
Alashorda úkimeti men Alash avtonomıasynyń 100 jyl tolýyna baılanysty uıymdastyrylyp otyrǵan alqaly jıynǵa qoǵam qaıratkerleri, tanymal tarıhshylar, belgili ǵalym-zertteýshiler jáne BAQ ókilderi qatysty.
Jıyn barysynda «Qasıetti Qazaqstan» ǵylymı-zertteý ortalyǵynyń dırektory Berik Ábdiǵalı men Abaı atyndaǵy Qazaq Ulttyq pedagogıkalyq ýnıversıtetiniń Qazaqstan tarıhy kafedrasynyń meńgerýshisi, tarıh ǵylymdarynyń doktory, profesor Mámbet Qoıgeldıev Alash avtonomıasynyń ult taǵdyryndaǵy róli jaıynda keńinen áńgimeledi.
«Alash avtonomıasynyń 90 jyldyǵyn ótkize almaǵan edik. Bıyl Alash avtonomıasynyń 100 jyldyǵyn ótkizip jatyrmyz. Osy oraıda kóptegen ister qolǵa alynǵan bolatyn. Alash avtonomıasynyń 100 jyldyǵyna baılanysty Qyzylorda oblysynda Mustafa Shoqaıdyń eskertkishin turǵyzyldy. Sonymen qatar alǵash ret Semeıde Álıhan Bókeıhanovtyń eskertkishi qoıyldy. Buǵan biz qýanamyz. Biraq áli de Alash avtonomıasyn tanystyrýymyz, jetkizýimiz kerek», - dedi Berik Ábdiǵalı.
Sonymen qatar Berik Ábdiǵalı Alash áskeri týraly baıandap berdi.
1918 jyly Alash áskeri qurylǵan bolatyn. Semeıde qurylǵanymen kóp uzamaı Alash áskeri taratyldy. Sebebi, ony ustap turý úshin qarajat pen qarý-jaraq kerek edi. Bilikti nusqaýshylar kerek bolatyn. Osylar bolmaǵannan keıin ásker taraýdyń aldynda turdy. Ol týraly Muhametjan Tynyshbaevtyń Álıhan Bókeıhanǵa «Eger sheshpeseńder - áskerdi taratamyn» degen haty da bar», - dedi tarıhshy ǵalym.
«Búgin úlken tusaýkeserge kelip otyrmyz. Óıtkeni Alash taqyryby máńgilik taqyryp. Alash qozǵalysy dúnıetanymdyq tarıhtyń ózegi. Sebebi, Alash halqymyzdy besiginde terbetip, eseıip at jalyn tartyp mingende boıyna kúsh-qýat jáne úmit hám senim bergen – ulttyq ıdeıa. Alashtyń kemshil tusy bar. Ol - Alash áskeri. Alash áskeri áli de zertteýdi qajet etetin dúnıe», – dep óz pikirin bildirdi Mámbet Quljabaıuly.
Jıyn sońynda Alashorda úkimeti men Alash avtonomıasynyń 100 jyldyǵynyń qurmetine baılanysty ál-Farabı atyndaǵy Qazaq Ulttyq ýnıversıtetiniń Qazaqstan tarıhy kafedrasynyń profesory, tarıh ǵylymdarynyń doktory Talas Omarbekovti, Almaty qalalyq ishki saıasat basqarmasynyń bastyǵy Nurlan Sydaqovty, Mádenıet basqarmasynyń bastyǵy Ǵalymjan Ótelbaevti, «Qamshy» aqparat agenttiginiń jetekshisi Bilál Qýanyshty, ál-Farabı atyndaǵy Qazaq Ulttyq Ýnıversıteti Fılologıa jáne álem tilderi fakúltetiniń dekany Ómirhan Ábdımanulyn, saıasattanýshy Aıdos Sarymdy jáne taǵy da basqa Alash rýhyn asqaqtatyp júrgenderdi arnaıy medalmen marapattady.
